मिरजेत खुनी हल्लाप्रकरणी तिघांना अटक

मिरज : मिरजेत झारी बाग चौकात दोन दिवसांपूर्वी सहा जणांनी काठ्या, लोखंडी गजाने हल्ला करून शानूर अमीर पेंढारी याला गंभीर जखमी केले. तोंडाला रुमाल बांधून आलेल्या सहा जणांनी मारहाण करून दहशत माजविली होती. मारहाण करून पळून गेलेल्या तिघांना पोलिसांनी मंगळवारी अटक केली. त्यांचे तीन साथीदार अद्याप फरारी आहेत.

पूर्ववैमनस्यातून सहा जणांनी लोखंडी गज व काठीने जबर मारहाण करून जिवे मारण्याचा प्रयत्न केल्याची तक्रार जखमी शानूर पेंढारी याने गांधी चौकी पोलिसांत दिली आहे. सहाजणांविरुद्ध खुनाच्या प्रयत्न केल्याचा गुन्हा दाखल करून गांधी चौक पोलीस ठाण्याचे सहायक पोलीस निरीक्षक रविराज फडणीस यांच्या पथकाने हल्लेखोर अस्लम बाडवाले, प्रसाद साळुंखे, किरण साळुंखे या तिघांना अटक केली. अन्य तिघेजण फरारी असल्याचे पोलिसांनी सांगितले.