मिरज एमआयडीसीत तरुणाकडून महिलेला मारहाण

कुपवाड : मिरज एमआयडीसीत रस्त्यावरून मोटारसायकलने जाणाऱ्या महिलेस बुधवारी एका तरुणाने रस्त्यावर अडवून मारहाण केली. याप्रकरणी संबंधित तरुणाच्या विरोधात कुपवाड एमआयडीसी पोलीस ठाण्यात गुन्हा दाखल करण्यात आला आहे.

श्रीकांत खाडे (रा.ज्ञानगिरी वसाहत, सावळी) असे गुन्हा दाखल झालेल्या संशयिताचे नाव आहे.

पोलिसांनी दिलेली माहिती अशी, पीडित महिला बुधवारी दुपारी मिरज एमआयडीसीतून मोटारसायकलवरून जात होती. त्यावेळी संशयित खाडे हा ज्ञानगिरी वसाहतपासून त्या महिलेचा पाठलाग करत होता. त्यानंतर त्याने मिरज एमआयडीसीत तिची मोटारसायकल अडवून तिला शिवीगाळ करत मारहाण केली. तिच्या चारित्र्याबद्दल अपप्रचार करणार असल्याची धमकी देऊन तिच्या हातातील मोबाइल हिसकावून घेऊन रस्त्यावर फोडून टाकून आर्थिक नुकसान केले. याबाबतची तक्रार पीडित महिलेने संशयित खाडे यांच्या विरोधात कुपवाड एमआयडीसी पोलीस ठाण्यात दिली आहे. त्यानुसार पोलिसांनी त्याच्या विरुद्ध गुन्हा दाखल केला असून, पोलीस तपास करीत आहेत.