सांगलीत नदीत बुडून महिलेचा मृत्यू

सांगली : शहरात कृष्णा नदीवरील स्वामी समर्थ घाट परिसरात नदीत पडून महिलेचा मृत्यू झाला. रेखा पांडुरंग शिवरे (वय ४५, रा. खणभाग, सांगली) असे मृत महिलेचे नाव असून, गुरूवारी रात्रीपासून त्या घरातून बाहेर पडल्या होत्या. शुक्रवारी पहाटेच्यासुमारास नदीत त्यांचा मृतदेह आढळून आला.

कृष्णा नदीवरील स्वामी समर्थ घाटावर पहाटेच्यासुमारास पोहण्यासाठी गेलेल्यांना पाण्यात महिलेचा मृतदेह तरंगताना दिसून आला. काठावर कपडे, पर्स, पाण्याची बाटली असे साहित्य होते. याची माहिती पोलिसांना दिली. मृतदेह पूर्णपणे निर्वस्त्र असल्याने पोलिसांनी लगेच तपास सुरू केला. मृतदेह शासकीय रुग्णालयात उत्तरीय तपासणीसाठी पाठविला. काठावर सापडलेल्या पर्समध्ये केवळ डायरी आणि काही नाणी असल्याने ओळख पटविण्यात अडचणी येत होत्या. पोलिसांनी नदीकाठावरील नागरिकांना फोटो दाखवत तपास सुरू केल्यानंतर मृत रेखा यांच्या बहिणीमुळे मृतदेहाची ओळख पटली.

मृत रेखा खणभागातील धनगर गल्लीत राहण्यास होत्या. त्यांना एक मुलगी आहे. त्यांचे मानसिक संतुलन ठीक नसल्याने त्या वारंवार घराबाहेर पडत होत्या. गुरुवारीही रात्री त्या बाहेर गेल्या होत्या. नदीकाठावर जाऊन आंघोळीसाठी त्या नदीत गेल्या असल्याची शक्यता असून, त्यांना पोहता येत नसल्याने बुडून मृत्यू झाल्याचा अंदाज आहे. उत्तरीय तपासणीनंतर मृतदेह नातेवाईकांच्या ताब्यात देण्यात आला.