कोरोनाविरोधातील महायुद्धाची जिल्ह्यात वर्षपूर्ती

सांगली : कोरोनाने जिल्ह्यावर पहिला फास टाकला, त्याला या महिन्यात वर्ष पूर्ण झाले. २२ मार्च २०२० रोजी पहिला रुग्ण सापडला, त्यानंतर आजअखेर जिल्ह्यातील रुग्णसंख्येने ५० हजारापर्यंत मजल मारली आहे. सध्या रुग्णसंख्या अत्यल्प असली तरी नागरिक पुरेसे सावरलेले नाहीत. कोरोनाविरोधातील या महायुद्धाची वर्षपूर्ती झाली आहे.

गेल्या पंधरवड्यापासून रुग्णसंख्या हळूहळू वाढत असल्याचे दिसत आहे. शुक्रवारी (दि. १२) ४३ नवे कोरोनाबाधित सापडले. त्यामुळे आरोग्य यंत्रणा व जिल्हा प्रशासन पुन्हा सतर्क झाले आहे. ऑगस्ट, सप्टेंबरमध्ये ५० हून अधिक कोविड सेंटर्स सुरू होती. सध्या पाचच सुरु असली तरी नव्याने सेंटर्स सुरू करण्यासाठी प्रशासन सज्ज आहे. जिल्हा क्रीडा संकुलातील सेंटरची नुकतीच साफसफाई करुन घेण्यात आली, तर मिरज शासकीय रुग्णालय १ मार्चपासून पुन्हा कोविड सेंटर म्हणून जिल्हाधिकाऱ्यांनी जाहीर केले.

कोरोनाने वर्षभर नाकेबंदी केली, त्राही त्राही करुन सोडले, तरी त्यातून नागरिक शहाणपण घेण्यास तयार नाहीत. बाजारपेठा व रस्त्यांवर मास्क न घालता वावरणारे, सोशल डिस्टन्सिंग न पाळणारे, सॅनिटायझर न वापरणारे नागरिक कोरोनाला पुन्हा आमंत्रण देत आहेत. लसीकरणाला हळूहळू प्रतिसाद मिळू लागला आहे, पण खुद्द आरोग्य कर्मचारी व महसूल प्रशासनातील शंभर टक्के लाभार्थ्यांनी लस टोचून घेतलेली नाही. जिल्हाधिकाऱ्यांनी पुन्हा लॉकडाऊनची शक्यता तूर्त फेटाळली असली तरी दुसऱ्या लाटेची शक्यता मात्र नाकारता येण्यासारखी नाही.

चौकट

कोविड सेंटर्समध्ये अत्यल्प रुग्ण

- सध्या जिल्हाभरात पाच कोविड सेंटर्स सुरू आहेत. मिरज सिव्हिल, भारती, मिरज चेस्ट, सिनर्जी आणि इस्लामपुरातील आधार रुग्णालयात कोरोनाबाधित उपचार घेत आहेत.

- रुग्णसंख्या अत्यल्प असल्याने ही रुग्णालये जवळपास रिकामीच आहेत. अन्य ५० हून अधिक कोविड सेंटर्समध्ये अन्य उपचार सुरु झाले आहेत.

चौकट

रेमडेसिव्हीर, फेव्हीपेरीयरचा पुरेसा साठा

कोरोनासाठी डॉक्टरांचे अस्त्र ठरलेली रेमडेसिव्हीर इंजेक्शन्स व फेव्हीपेरीयर गोळ्यांचा पुरेसा साठा जिल्ह्याच्या आरोग्य यंत्रणेकडे आहे. किंबहुना रुग्ण अत्यल्प असल्याने त्यांच्या तुटवड्याचा प्रश्नच निर्माण झालेला नाही. वापरही मोजकाच सुरू आहे. याव्यतिरिक्त अन्य अैाषधे मुबलक प्रमाणात उपलब्ध आहेत.

चौकट

पहिला पॉझिटिव्ह सध्या ठणठणीत

- परदेशातून धार्मिक स्थळावरून आलेल्या इस्लामपुरातील कुटुंबात पहिला कोरोना रुग्ण सापडला. लक्षणे जाणवल्याने चाचणी केली असता कोरोनाची लागण स्पष्ट झाली. सध्या हा रुग्ण ठणठणीत आहे.

- त्यानंतर इस्लामपूर शहरात एकापाठोपाठ एक २४ जण बाधित झाले. या सर्वांना मिरज कोविड रुग्णालयात दाखल केले गेले. तेथे अत्यंत काळजीपूर्वक उपचार झाल्याने सर्व कोरोनाबाधित सहीसलामत बरे झाले.

- सामान्य नागरिक, प्रशासन व आरोग्य यंत्रणा या सर्वांसाठीच हा आजार पूर्णत: नवा असल्याने सारेच गोंधळात होते. पण मिरज रुग्णालयातील डॉक्टर, परिचारिका, सफाई कर्मचारी या सर्वांनी धीर दिला. आत्मविश्वास जागविला. यातून सर्व कोरोनाबाधित बरे होऊन घरी परतले.

ग्राफ

असे वाढले रुग्ण

१ मार्च २०२० - ०, १ एप्रिल - २५, १ मे - २००, १ जून - ११२, १ जुलै - ३८४, १ ऑगस्ट - २६४३, १ सप्टेंबर - १२३९४, १ ऑक्टोबर - ३६८१४, १ नोव्हेंबर - ४५०८५, १ डिसेंबर - ४६७८३, १ जानेवारी २०२१ - ४७६१२, १ फेब्रुवारी - ४८१०५, १ मार्च - ४८५३८

पॉईंटर्स

- जिल्ह्यातील पहिला रुग्ण आढळला - २२ मार्च २०२०

- कोरोनाचे एकूण रुग्ण - ४८,८६६

- बरे झालेले रुग्ण - ४६,७७६

- एकूण कोरोना बळी - १,७६५

- सध्या उपचार सुरु असलेले रुग्ण - ३२५

- कोविड सेंटर्स संख्या - ५