बावचीनजीक अपघातात पडवळवाडीच्या युवकाचा मृत्यू

गोटखिंडी : बावची (ता. वाळवा) येथे इस्लामपूर जोड रस्त्यावर अज्ञात ट्रॅक्टर व दुचाकीच्या धडकेत युवकाचा जागीच मृत्यू झाला. विजय उत्तम चव्हाण (वय ३२, रा. पडवळवाडी, ता. वाळवा) असे मृताचे नाव आहे. हा अपघात शुक्रवारी रात्री ८.३० च्या दरम्यान घडला. या अपघाताची नोंद रात्री आष्टा पोलीस ठाण्यात झाली आहे.

विजय चव्हाण हा शुक्रवारी रात्री दुचाकीवरून (एमएच १० सीई ७९२९) पडवळवाडीहून आष्टा येथील शिंदे मळा येथे नातेवाइकांकडे थांबलेल्या वडिलांना घरी आणण्यासाठी जात होता. यावेळी बावची येथील शिरोळकर मळ्यानजीक अज्ञात ट्रॅक्टरने त्याच्या दुचाकीला जोराची धडक दिली. यात विजयच्या चेहऱ्याला जबर मार लागून त्याचा जागीच मृत्यू झाला. अपघातानंतर ट्रॅक्टरसह चालकाने घटनास्थळावरून पलायन केले.

रात्रीची वेेळ आणि पाऊस असल्याने रस्त्यावर वर्दळ नव्हती. यामुळे अपघातातील ट्रॅक्टरबाबत अधिक माहिती समजली नाही. अपघाताच्या आवाजाने नागरिक घटनास्थळी दाखल झाले. मृत विजयच्या चेहऱ्यावर गंभीर इजा झाल्याने त्याची प्रथम ओळख पटली नाही. मात्र त्याचा या परिसरात नेहमी वावर असल्याने त्यांची दुचाकी पाहून तो पडवळवाडी येथील असल्याचे समजले. यानंतर कुटुंबीय व नातेवाइकांना माहिती दिल्यावर ते घटनास्थळी आल्यावर त्याची ओळख पटली. यावेळी कुटुंबीयांनी केलेला आक्रोश हृदय पिळवटून टाकणारा होता.

आष्टा येथील डांगे कॉलेज परिसरात विजय चव्हाण याचा खाद्यपदार्थ विक्रीचा व्यवसाय होता. त्यांच्या पश्चात आई, वडील, पत्नी, दोन मुले, दोन भाऊ असा परिवार आहे. या घटनेची आष्टा पोलीस ठाण्यात नोंद झाली असून अधिक तपास सुरू आहे.