तब्बल ३८ लाखाचे सोन्यासह हिऱ्याचे दागिने लंपास

कऱ्हाडातील घटना : खिडकीचे गज कापून चोरटे घुसले बंगल्यात

कऱ्हाड : बंगल्याच्या दरवाजानजीक असलेल्या खिडकीचे गज कापून आत घुसलेल्या चोरट्यांनी सोन्या-चांदीसह हिऱ्याचे तब्बल ३८ लाखाचे दागिने लंपास केले. कऱ्हाड शहरातील छत्रपती शिवाजी महाराज स्टेडियमजवळ शिवाजीनगर हाऊसिंग सोसायटीत ही घटना घडली. याबाबत नरेंद्र वसंतराव जानुगडे यांनी कऱ्हाड शहर पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, शहरातील छत्रपती शिवाजी महाराज स्टेडियमनजीक शिवाजीनगर हाऊसिंग सोसायटी आहे. या सोसायटीत नरेंद्र जानुगडे यांचा बंगला असून या बंगल्यात ते कुटुंबासह वास्तव्यास आहेत. ३० मार्चपासून १ एप्रिलच्या रात्रीपर्यंत जानुगडे कुटुंबीय बंगळूर येथे कामानिमित्त गेले होते. बंगल्यातून बाहेर पडताना त्यांनी बंगल्याला कुलूप लावून सर्व दरवाजे, खिडक्या बंद केल्या होत्या. सोमवारी रात्री हे कुटुंबीय बंगळूरहून कऱ्हाडात आले. त्यावेळी बंगल्याचा दरवाजा कटविण्याचा प्रयत्न केला असल्याचे त्यांच्या निदर्शनास आले. तसेच दरवाजाशेजारी असलेली खिडकी उचकटण्यात आली होती. खिडकीचे दोन गज कापण्यात आले होते.

घरात चोरी झाल्याचा संशय आल्यामुळे कुटुंबीय तातडीने घरामध्ये गेले. त्यावेळी बेडरूमचा दरवाजा तोडलेला दिसला. तसेच बेडरूममधील वॉर्डरोबमध्ये असलेले सोन्याचे, हिºयाचे आणि चांदीचे दागिने चोरीस गेल्याचे नरेंद्र जानुगडे यांच्या निदर्शनास आले. याबाबत जानुगडे यांनी कऱ्हाड शहर पोलीस ठाण्यात फिर्याद दिली आहे. पोलीस उपनिरीक्षक देवकर तपास करीत आहेत.