जुगारप्रकरणी सात जणांविरुद्ध गुन्हा दाखल

फलटण : झिरपवाडी येथे फलटण शहर पोलिसांनी छापा टाकून तीन पानी पत्त्यावर जुगार खेळत असलेल्या सात जणांविरुद्ध गुन्हा दाखल केला आहे. त्यातील तिघा जणांना अटक केली आहे. या ठिकाणाहून २ लाख १८ हजार ७५० रुपये किमतीचे रोख रक्कम व जुगाराचे साहित्य जप्त केले आहे.

याबाबत फलटण शहर पोलीस ठाण्यातून मिळालेली माहिती अशी, झिरपवडी हद्दीत सोमवारी (दि. ३) सायंकाळी सहाच्या सुमारास पेट्रोलपंपाच्या पाठीमागील मोकळ्या पत्र्याच्या शेडमध्ये चंद्रकांत भीमराव जाडकर (रा. निरगुडी, ता. फलटण), निलेश लक्ष्मण कदम (रा. गिरवी), नितीन मोहन गायकवाड (रा. तरडगाव), माउली भिवरकर (रा. धुळदेव), विशाल पवार (रा. सोमवार पेठ चौक, फलटण), सचिन गुंजवटे (रा. झिरपवाडी), कुणाल लालासाहेब भंडलकर (रा. उमाजी नाईक चौक, फलटण) यांनी तोंडाला मास्क न लावता एकत्र बसून जुगार खेळत असताना आढळून आले. त्यांच्याकडून २ लाख १८ हजार ७५० रुपये किमतीची रोख रक्कम व जुगाराचे साहित्य जप्त करण्यात आले.

सर्व संशयित आरोपींनी कोरोना विषाणूचा प्रादुर्भाव वाढण्याच्या दृष्टीने व इतरांच्या जीवितास धोकादायक असलेल्या रोगाचा संसर्ग पसरविण्याचा तसेच जिल्हाधिकारी यांच्या आदेशाचा भंग केला. याप्रकरणी चंद्रकांत जाडकर, निलेश कदम, नितीन गायकवाड या तिघांना अटक करण्यात आलेली आहे. ही कारवाई पोलीस निरीक्षक भारत किंद्रे, सहायक पोलीस निरीक्षक सचिन राऊळ, शरद तांबे, सतीश दडस यांनी केली. पोलीस कॉन्स्टेबल सतीश दडस यांंनी फिर्याद दिली. अधिक तपास पोलीस हेडकॉन्स्टेबल दिलीप येळे करीत आहेत.