पत्र्यावरून पडल्याने कामगाराचा मृत्यू

शिरवळ : शिरवळ येथील जुन्या औद्योगिक वसाहतीत साफसफाई करत असताना पारदर्शक पत्रा तुटून ३५ ते ४० फूट खाली पडल्याने गंभीर जखमी झालेल्या कंत्राटी कामगाराचा मृत्यू झाला. राहुल पोपट कुंभार (वय ३०, रा. किन्हई, ता. कोरेगाव) असे मृत्यू झालेल्या कामगाराचे नाव आहे.

शिरवळ पोलिसांनी दिलेली माहिती अशी की, एका कंपनीत योगेश हिंगे हा कंत्राटी कामगार सौर पॅनलची साफसफाई करण्यासाठी राहुल कुंभार हा आला. साफसफाई करत असताना कंपनीतील खालच्या मजल्यावर सौर पॅनल स्वच्छ करून वरच्या मजल्यावर दोघेही साफसफाई गेले. तेव्हा राहुल कुंभार याने योगेशला ‘तू सोलरवर पाणी मार, मी फोटो काढतो’, असे सांगितले. राहुल कुंभार हा फोटो काढत असताना कंपनीमधील पारदर्शक पत्र्यावर गेला असता, पत्रा तुटला. यावेळी राहुल कुंभार हा अंदाजे ४० फूट खाली पडल्याने गंभीर जखमी झाला.

याबाबतची माहिती मिळताच पोलीस हवालदार अरुण भिसे-पाटणकर, शिवराज जाधव यांनी धाव घेतली. तत्पूर्वी कंपनीतील रवींद्र खोबरे, शिवकुमार नायडू या कामगारांनी शिरवळ येथील खासगी रुग्णालयात दाखल केले. उपचारादरम्यान राहुल कुंभार याचा मृत्यू झाला. राहुल कुंभार याचे शवविच्छेदन शिरवळ येथील प्राथमिक आरोग्य केंद्रात करून मृतदेह नातेवाइकांच्या ताब्यात देण्यात आला. या घटनेची फिर्याद योगेश हिंगे याने शिरवळ पोलीस ठाण्यात दिली. पोलीस तपास करत आहेत.