दांडक्याने मारहाण करून कामगाराचा खून

रवी अशोक यादव (वय २४, रा. उत्तर प्रदेश, सध्या रा. भैरवनाथ वर्कशॉप, पाचवडफाटा) असे खून झालेल्या युवकाचे नाव आहे, तर रामप्रसाद ऊर्फ रामू परमेश्वर गोस्वामी (रा. रामप्रसाद खेडा, उत्तर प्रदेश) याला पोलिसांनी खूनप्रकरणी अटक केली आहे. राहुल मोहन यादव (रा. कालेटेक) याने याबाबतची फिर्याद ग्रामीण पोलीस ठाण्यात दिली आहे.

पोलिसांनी दिलेल्या माहितीनुसार, कालेटेक येथील राहुल यादव याचे पाचवडफाटा येथे भैरवनाथ ऑटो वर्कशॉप व सुरक्षा ऑटोमोबाईल अशी दुकाने आहेत. त्याच्या दुकानात रवी यादव हा चार महिन्यांपासून कामास असून, तो दुकानातच राहत होता. शुक्रवारी रात्री राहुल हा त्याचे ऑटोमोबाईल दुकान बंद करून भैरवनाथ वर्कशॉपकडे येत असताना रवी यादव याला रामप्रसाद हा बर्फ फोडण्याच्या लाकडी दांडक्याने मारहाण करीत असल्याचे दिसले. हे पाहून राहुल घटनास्थळाकडे धावला. त्यावेळी रामप्रसाद हातातील लाकडी दांडके तेथेच टाकून निघून गेला. राहुल धावत रवीजवळ गेला असता त्याच्या डोक्यातून व उजव्या बाजूच्या कानाच्या मागून रक्त येत असल्याचे त्याच्या निदर्शनास आले. तसेच तो निपचित पडलेला होता. कसलीच हालचाल करत नव्हता. त्यावेळी राहुलसह साई बालाजी हॉटेलचे व्यवस्थापक चैतन्य कांबळे, दिनेश भाटी यांनी जखमी रवी यादवला कृष्णा रुग्णालयात उपचारासाठी दाखल केले. मात्र, उपचारापूर्वीच डॉक्टरांनी रवी मृत झाल्याचे सांगितले. या प्रकरणी पोलिसांनी आरोपी रामप्रसाद गोस्वामी याला अटक केली आहे.

फोटो : २०रवी यादव

कॅप्शन : मृत रवी यादव