डोंगरावर तरुणीला दारू पाजून अश्लील कृत्य

सातारा : केळवली (ता. सातारा) गावच्या हद्दीतील डोंगरावर फोटोसेशनसाठी गेलेल्या १९ वर्षीय तरुणीला जबरदस्तीने दारू पाजून तिच्याशी अश्लील चाळे करण्यात आल्याचा खळबळजनक प्रकार उघडकीस आला आहे. याप्रकरणी सातारा तालुका पोलीस ठाण्यात पाच युवकांसह एका युवतीवर गुन्हा दाखल करण्यात आला आहे.

याबाबत पोलिसांनी दिलेली माहिती अशी की, संबंधित मित्र-मैत्रिणी दिनांक १३ रोजी सकाळी साडेअकरा वाजता कारने केळवली परिसरातील डोंगरामध्ये फोटोसेशनसाठी गेले होते. यामध्ये दोन मुली आणि पाच मुलांचा समावेश होता. मुलांनी १९ वर्षीय तरुणीला जबरदस्तीने दारू पाजली. त्यानंतर त्या तरुणीशी काही मुलांनी अश्लील चाळे केले. तसेच त्या तरुणीने विरोध केल्यानंतर त्या तरुणीला कारमध्ये बसवून मारहाणही करण्यात आली. या प्रकारानंतर भांबावलेल्या तरुणीने साताऱ्यात आल्यानंतर हा प्रकार आपल्या वडिलांच्या कानांवर घातला. त्यानंतर, वडिलांनी तत्काळ आपल्या मुलीला घेऊन सातारा तालुका पोलीस ठाणे गाठले. संबंधित तरुणीने केळवली डोंगरावर घडलेला प्रकार पोलिसांसमोर कथन केला. त्यानंतर, पोलीस उपनिरीक्षक मनोहर फरांदे यांनी या प्रकरणाची गांभीर्याने दखल घेऊन एका अल्पवयीन युवकाला ताब्यात घेतले, तर त्याचे अन्य साथीदार फरार असून हे सर्व जण अल्पवयीन मुले असल्याचे पोलिसांच्या तपासात समोर येत आहे.

दरम्यान, हल्ली फोटोसेशनचे फॅड तरुण-तरुणींमध्ये दिसून येत असून कास-बामणोली या परिसरामध्ये दुपारच्या सुमारास मुले आणि युवती फोटोसेशन करत असल्याचे पाहायला मिळत आहे. संबंधित मुले ही कॉलेज बुडवून पठारावर फिरत असतात. पालकांना हे प्रकार माहीत नसल्यामुळे पालकांनी आपल्या मुलांवर लक्ष ठेवणे गरजेचे असल्याचे पोलिसांचे म्हणणे आहे.