ठेकेदाराच्या हलगर्जीपणामुळे मलकापुरात अपघाताचा धोका

मलकापुरातील उपमार्गातून खुदाई करत विविध कंपन्यांची ऑप्टीकल फायबर केबल टाकण्यासाठी स्पर्धाच लागलेली असते. काही दिवसांपासून पूर्वेकडील उपमार्गावर चर काढून ऑप्टीकल फायबर केबल टाकण्याचे काम एका कंपनीला दिले आहे. संबंधित कंपनी सबकंत्राटदाराकडून हे काम करून घेत आहे. मात्र, संबंधित कंत्राटदाराने हे काम करत असताना नियम धाब्यावर बसवून काम करणे सुरूच ठेवले आहे. काम झाल्यानंतर चर व खड्डे केवळ माती व दगडाच्या सहाय्याने बुजवले जातात. तर काही ठिकाणी उकरलेली माती तशीच ठेवली जाते. रात्रीच्यावेळी जेसीबीच्या सहाय्याने चर काढतात. केबल टाकून झाल्यावर जेसीबीनेच ती बुजवतात. त्यामुळे अनेक ठिकाणी दगड व मातीचे ढीग तसेच पडलेले आहेत. केबलचा जोड असणाऱ्या ठिकाणी मोठा खड्डा तयार केला आहे. त्याला सुरक्षिततेसाठी केवळ पट्ट्या बांधल्या जातात. असे खड्डे रात्रीच्यावेळी धोकादायक ठरत आहेत.

अनेक ठिकाणी चर बुजवण्यासाठी लावलेल्या ढिगातील खडीमिश्रीत माती कंत्राटदाराच्या हलगर्जीपणामुळे उपमार्गावर पसरल्याने सायकलसह दुचाकी घसरण्याच्या घटना घडत आहेत. खडीमिश्रीत माती कंत्राटदाराच्या हलगर्जीपणामुळे उपमार्गावर पसरल्याने सायकलसह दुचाकी घसरण्याच्या घटना घडत आहेत.

- कोट

कंत्राटदाराच्या हलगर्जीपणामुळे रस्त्यावर दगडमाती पसरली आहे. दोन शाळकरी मुलांच्या सायकली घसरून पडल्याने ते गंभीर जखमी झाले आहेत. त्यापैकी एकाचा हात फ्रॅक्चर झाला आहे. वाहनाच्या वर्दळीने उपमार्गालगतच्या व्यावसायिकांसह प्रवाशांना धुळीचा त्रास सहन करावा लागत आहे.

- नितीन काशिद-पाटील

शिवसेना तालुकाप्रमुख

- चौकट

नेमकी नुकसानभरपाई कुणाकडे?

मलकापुरातील महामार्गासह दोन्हीही उपमार्ग रस्ते विकास महामंडळाच्या अखत्यारित आहेत. विविध कंपनीच्या केबल टाकण्याच्या कामाला संबंधित शासकीय विभाग की पालिका, यापैकी नेमके कोण परवानगी देते? या कामात झालेल्या रस्त्याच्या नुकसान भरपाईची जबाबदारी नेमकी कोणाकडे आहे, याचा शोध घेण्याची गरज आहे.

- चौकट

अवजड वाहनांचे चाक खोलात

चर काढतानाच केबल टाकली आहे. मात्र, साधारणपणे प्रत्येक शंभर मीटर अंतरात केबल जोडणीसाठी खोल खड्डे खणण्यात आले आहेत. हेच खड्डे धोकादायक बनले आहेत. चर व खड्ड्यांमध्ये वाहने अडकण्याच्या घटना वारंवार घडत आहेत.

फोटो : १८केआरडी०१

कॅप्शन : मलकापूर येथे केबलसाठी चर खोदण्याचे काम सुरू असून ठेकेदाराच्या हलगर्जीपणामुळे खडीमिश्रीत माती उपमार्गावर पसरली आहे. (छाया : माणीक डोंगरे)