वृक्षतोडीबाबत सर्वेक्षण करा

बबन साळगावकर यांचे आदेश : सावंतवाडी नगरपालिकेची मासिक बैठक

सावंतवाडी : शहरात कोणत्याही ठेकेदाराने नगरपालिकेच्या पूर्वपरवानगीशिवाय निवासी संकुलासाठी वृक्षतोड केली असेल तर त्याचे सर्वेक्षण करा आणि ज्यांनी परवानगी घेतली नसेल अशांवर फौजदारी गुन्हे दाखल करा, असे आदेश नगराध्यक्ष बबन साळगावकर यांनी मुख्याधिकारी विजयकुमार द्वासे यांना दिले. नगरपालिकेच्या मासिक बैठकीत उपनगराध्यक्ष राजन पोकळे यांनी दिलेल्या पत्राच्या अनुषंगाने हे आदेश देण्यात आले आहेत.
सावंतवाडी नगरपालिकेची मासिक बैठक नगराध्यक्ष बबन साळगावकर यांच्या अध्यक्षतेखाली मंगळवारी पार पडली.
यावेळी नगरपालिकेचे मुख्याधिकारी विजयकुमार व्दासे, नगरसेवक संजय पेडणेकर, गोविंद वाडकर, अ‍ॅड. सुभाष पणदूरकर, उमाकांत वारंग, राजू बेग, नगरसेविका अनारोजीन लोबो, शर्वरी धारगळकर, अफरोझ राजगुरू, कीर्ती बोंद्रे, साक्षी कुडतरकर, क्षिप्रा सावंत आदी बैठकीला उपस्थित होते.
यावेळी सावंतवाडी नगरपालिका सबनीसवाडा येथे जलनि:सारण प्रकल्प राबवत आहे. याला नगरसेवक गोविंद वाडकर यांनी आक्षेप घेत शहरात उभाबाजार, तसेच सालईवाडा येथे मोठ्या प्रमाणात सांडपाणी निर्माण होते. हा भाग उंचावर आहे. मात्र, सखल असलेल्या सबनीसवाडा भागात जलनि:सारण प्रकल्प कशासाठी, असा सवाल उपस्थित केला. यावर नगराध्यक्ष बबन साळगावकर यांनी जलनि:सरण प्रकल्प हा सबनीसवाडा हा प्रभाग माझ्या मतदारसंघात येतो म्हणून करण्यात आला नाही. तर संपूर्ण शहराचे सांडपाणी हे सबनीसवाडा भागातच येते. त्यामुळे निरा कंपनीच्या सहाय्याने पायलट प्रकल्प म्हणून राबवण्यात येत आहे. हा प्रयोग यशस्वी झाल्यास शहरात अन्य ठिकाणीही असे प्रकल्प राबवण्यात येणार असल्याचे त्यांनी सांगितले.
मागासवर्गीय मुलांना शाळेचे गणवेश उशिरा देण्यात आले आहेत. हा मुद्दा नगरसेवक वाडकर यांनी उपस्थित केला. त्यावर नगराध्यक्ष बबन साळगावकर यांनी ज्याठिकाणी शाळेच्या मुलांना गणवेश उशिरा मिळाले असतील, त्यांची यादी तयार करा व ठेकेदार दंडात्मक कारवाई करा, अशी सूचना अधिकाऱ्यांना दिली. तर शहरात पूर्वपरवानगी शिवाय निवासी संकुलाच्या जाग्यावरील वृक्षतोडप्रकरणी लवकरच सर्वेक्षण करण्यात येणार असून, अशा ठेकेदारांवर दंडात्मक कारवाई करून फौजदारी गुन्हे दाखल करण्यात येणार असून, त्यांच्या बांधकामाची परवानगीही रद्द करण्यात येणार आहे.
त्यांची कडक अमलबजावणी करा, असे नगराध्यक्षांनी प्रशासनाला सांगितले. उपनगराध्यक्ष राजन पोकळे हे सभागृहात अनुपस्थित असल्याने त्यांच्या पत्राचे वाचन अ‍ॅड. सुभाष पणदूरकर यांनी केले. (प्रतिनिधी)
बाप्पा नार्वेकरांचा आदरपूर्वक उल्लेख करा : उमाकांत वारंग यांना सभ्यतेचा डोस
सावंतवाडीत मध्यवर्ती असलेल्या संकुलाच्या कै. बाप्पा नार्वेकर संकुलाच्या ठिकाणी अद्ययावत संकुल उभारण्यात येणार आहे. याचा ठराव वाचत असताना नगरसेविका क्षिप्रा सावंत यांनी ठरावातील उल्लेखाप्रमाणे बाप्पा एवढेच नाव घेतले, याला नगरसेवक राजू बेग यांनी आक्षेप घेत कै. बाप्पा नार्वेकर आदरणीय व्यक्ती होती. त्यांचे नाव आदरपूर्वक घ्या, असे सांगितले. यावरून नगराध्यक्षांनी दिलगिरी व्यक्त करीत चूक झाल्याचे मान्य केले.
पालिका बैठकीत मुलांना गणवेश उशिरा दिल्यावरून चर्चा सुरू असतानाच नगरसेवक उमाकांत वारंग यांनी पँट अगोदर दिली का, असा प्रश्न सभागृहात केला. त्यावर नगराध्यक्ष बबन साळगावकर चांगलेच सतापले आणि त्यांनी वारंग यांना हे सभागृह आहे. येथे सभ्यतेनेच बोला, विषयांची चेष्टा करू नका, असे बजावले.
‘आरटीओ’ कॅम्पला जागा द्या
सावंतवाडी विश्रामगृहाच्या बाहेर आरटीओ कॅम्प घेण्यात येत होता. मात्र, यामुळे वाहतुकीला मोठा अडथळा होत असल्याचे लक्षात येताच पालिकेने मंगळवारच्या बैठकीत ठराव घेऊन हा कॅम्प जिमखाना नजीकच्या मैदानावर घेण्याचे ठरवले असून, त्याला सभागृहाने एकमताने मान्यता दिली. विनामोबदला हा कॅम्प भरवण्यास देण्यात येणार आहे.