झाडाखाली खेळणाऱ्या समर्थचा शेततळ्यात पडून मृत्यू

सोलापूर/माढा : चुलत भावासोबत झाडाखाली खेळणारा पाचवर्षीय समर्थ शेततळ्यात पडून मृत पावला. यावेळी नातलग शेतात खुरपत होते. घटनेनंतर नातेवाइकांनी आक्रोश केला, घटनेचे वृत्त धडकताच फरतडे वस्ती (ता. माढा) वर शोककळा पसरली. समर्थ समाधान फरतडे (वय ५) असे मरण पावलेल्या बालकाचे नाव असून शनिवार, सायंकाळी ४ वाजता ही घटना घडली. या घटनेने हळहळ व्यक्त होत आहे.

पाचवर्षीय समर्थ शनिवारी सायंकाळी त्याच्या चुलत भावाबरोबर शेततळ्याजवळ झाडाखाली खेळत होता. दरम्यान, तो शेततळ्यात जाऊन पडला. त्याची आई जवळच शेतात खुरपत होती. तो नातेवाइकांना दिसत नसल्याने सर्वांनी त्याचा शोध घ्यायला सुरुवात केली. शेततळ्याजवळ त्याची चप्पल आढळून आली. आत डोकावले असता तो शेततळ्यात आढळून आला. नातेवाइकांनी त्याला बाहेर काढून ग्रामीण रुग्णालयात उपचारासाठी दाखल केले. मात्र, उपचारापूर्वी तो मरण पावल्याचे डॉक्टरांनी घोषित केले. या घटनेनंतर त्याच्या नातेवाइकांनी एकच आक्रोश केला.