अपघात रोखण्यासाठी केला जातोय सर्व्हे

देशात व महाराष्ट्रात अपघातांमुळे वर्षाकाठी हजारो नागरिकांचे नाहक जीव बळी जात आहेत. मृत्यूच्या व जखमींच्या आकड्यात दिवसेंदिवस भर पडत असल्याने एका सामाजिक कार्यकर्त्याने सुप्रीम कोर्टात याचिका दाखल केली होती. या याचिकेवर सुनावणी होऊन सुप्रीम कोर्टाने प्रत्येक जिल्ह्यात अपघाताचा सर्व्हे करण्याचे निर्देश दिले आहेत.

यानुसार सोलापूर जिल्ह्यात सन २०१७ ते २०१९ दरम्यान झालेल्या अपघातस्थळांचा सर्व्हे जिल्हा ग्रामीणच्या पोलीस अधीक्षिका तेजस्वी सातपुते व अतिरिक्त पोलीस अधीक्षक अतुल झेंडे यांच्या मार्गदर्शनाखाली जिल्हा वाहतूक शाखेचे पोलीस निरीक्षक धनंजय जाधव, पोलीस हवालदार डिंगरे, येळनोरे, पोलीस शिपाई शिवाजी सोनवले यांच्या पथकाने मंगळवारी सोलापूर ते उजनी (भीमानगर) या दरम्यान असलेल्या २८ अपघातस्थळांची तर बुधवारी सोलापूर-कोल्हापूर महामार्गावरील सोलापूर ते सांगोला ७ ब्लॅक स्पॉट ठिकाणांचा सर्व्हे केला.

अपघातग्रस्त ठिकाणे

करमाळा राष्ट्रीय महामार्ग क्र. ५६१ वरील देवळाली, मांगी पुलाचे वळण, मोहोळ राष्ट्रीय महामार्ग क्र. ६५ वरील सावळेश्‍वर दर्गा, अर्जुनसोंड फाटा, लांबोटी, चंदननगर, वडवळ फाटा, कन्या प्रशाला चौक, नरखेड क्रॉस रोड, कचरे पेट्रोल पंप, यावली क्रॉस रोड, अनगर फाटा, चिखली टॉवर, हिवरे फाटा, तेलंगवाडी, शेटफळ-माढा फाटा, मंगळवेढा राष्ट्रीय महामार्ग क्र. १६६ वरील कचरेवाडी फाटा, आंधळगाव, मंगळवेढा शहर बोराळे नाक्याजवळ, माचणूर ते ब्रह्मपुरी रोडवर, कामती महामार्ग क्र. ४६५ कोरवली चौक कॉर्नर, परमेश्‍वर पिंपरी ते कुरुल, वाघोली शिवार आदी ठिकाणांना या पथकाने भेट देऊन अपघातस्थळांची पाहणी करत तेथील नागरिकांची मते जाणून घेतली. अपघात रोखण्यासाठी अपघातस्थळी विविध सिम्बॉल व फलक लावून प्रयत्न केले जाणार असल्याचे पथकाने सांगितले.

ओळी :::::::::::::::

माचणूर येथे अपघातस्थळाची पाहणी करताना पोलीस निरीक्षक धनंजय जाधव व इतर कर्मचारी.