चाकूचा धाक दाखवून केली साडेसात लाखाची चोरी; माढ्यातील न्यायालय परिसरातील घटना

सोलापूर लोकमत ब्रेकींग

माढा - माढ्यातील न्यायालयाच्या इमारतीच्या पाठीमागील घरात सुमारे साडेसात लाख रुपये किमतीचे सोन्याचे दागिने व १० हजार किमतींचा मोबाईल चोरीला गेल्याची घटना शुक्रवार ८ रोजी पहाटे तीनच्या सुमारास घडल्याने परिसरात खळबळ उडाली आहे.

याबाबत अमृता प्रशांत जगताप यांनी माढा पोलिसात फिर्याद दिली आहे.  अमरदीप भांगे हे बेडरूममध्ये झोपले होते तर त्यांची पत्नी व मुलगी नातवासह हाॅल मध्ये झोपले होते. शुक्रवार पहाटे घराच्या जिन्यातून आवाज आल्याने फिर्यादी अमृता व त्यांची आई अश्विनी तसेच मुलगा प्रशांत हे जागे झाले, त्यावेळी डोळे उघडून पाहिले असता समोर चार इसम दिसल्याने घाबरून गेलेल्या अमृता व कुटुंबीयांना जागेवरून हलू नका असे म्हणत चाकूचा धाक दाखविला. याचवेळी  घरातील कपाटात ठेवलेल्या  चार तोळे पाटल्या, पाच तोळ्याचे गंठण , चार तोळे बांगड्या, पाच तोळे लॉकेट, दोन तोळ्याचे मिनी गंठण, कर्णफुले, एक ग्रॅम व दोन ग्रॅम बदाम व कळस व एक मोबाईल असा सात लाख ६१ हजार रुपयाचा ऐवज अज्ञात चोरट्यांनी चोरून नेल्याची  तक्रार पोलिसात दाखल झाली आहे. या घटनेची माहिती मिळताच घटनास्थळी  पोलीस उपअधीक्षक अभिजीत धाराशिवकर, सहाय्यक पोलीस निरीक्षक अमूल कादबाने, पोलीस उपनिरीक्षक किरण घोंगडे यांनी भेट दिली.