कोरवलीजवळ अपघातात दुचाकीस्वार ठार

कामती : लग्न सोहळा उरकून गावाकडे निघालेल्या दुचाकीवरील दोघांना मोहोळ - मंद्रुप महामार्गावर कोरवली येथे वाहनाने धडक दिली. या अपघातात दुचाकीस्वार जागीच ठार झाला, तर पाठीमागे बसलेला दुसरा व्यक्ती गंभीर जखमी झाला.

रविवारी दुपारी हा अपघाता झाला.

पोलीस सूत्रांकडील मिळालेल्या माहितीनुसार, १८ जुलै रोजी कोरवली येथे नातेवाइकाचे लग्न असल्याने गावडेवाडी (ता. दक्षिण सोलापूर) येथील बळवंत लक्ष्मण वाघमोडे व त्यांचा मित्र महादेव धारू गावडे हे दोघे दुचाकीने (क्र. एमएच १३ डीजे १३५४) लग्नासाठी आले होते. लग्नसमारंभ उरकून जात असताना कोरवली शिवारात राम जाधव यांच्या वस्तीजवळ त्यांच्या दुचाकीला अनोळखी वाहनाची धडक बसली. त्यामध्ये बळवंत वाघमोडे (वय ४५) हे जागीच मरण पावले, तर महादेव गावडे हे गंभीर जखमी झाले. अपघाताची माहिती मिळताच कामती पोलीस घटनास्थळी दाखल झाले. त्यांनी स्थानिक नागरिकांच्या मदतीने जखमी गावडे यांना सोलापूर येथील शासकीय रुग्णालयात दाखल केले.