फांदी पडून घर आणि तीन दुकानांसह दोन गाड्यांचे नुकसान

ठाणे: शहरात फ्लॉवर व्हॅली येथे दोन चारचाकी गाड्यांवर तर कॅसल मील परिसरात तीन दुकानांवर तसेच आंबेडकर रोड येथे एका घरावर अशा तीन वेगवेगळ्या घटनांमध्ये झाडाच्या फांद्या पडल्याच्या घटना समोर आल्या आहेत. या तिन्ही घटनांमध्ये घरासोबत तीन दुकानांसह दोन गाड्यांचे नुकसान झाले  असून पडलेली फांदी कापून बाजूला केली आहे. सुदैवाने या घटनेमध्ये कोणालाही दुखापत झालेली नाही. 

शहरातील फ्लॉवर व्हॅली, सर्विस रोड, या ठिकाणी ०२ चारचाकी वाहनावरती शुक्रवारी दुपारी दीड वाजण्याच्या सुमारास झाडाची फांदी पडली. त्यामुळे त्या गाड्यांचे नुकसान झाले आहे. तर मीनाताई ठाकरे चौक, कॅसल मील, या ठिकाणी शुक्रवारी दुपारी साडेबारा वाजण्याच्या सुमारास ०३ दुकानावरती झाडाची फांदी पडली. या दुकानांच्या छताचे पत्रे फुटून किरकोळ नुकसान झाले आहे. तसेच फुलेनगर, आंबेडकर रोड, या ठिकाणी लॉरी स्टॅन्ड जवळ रणपिसे चाळी मधील घरावर शुक्रवारी दुपारी अडीच वाजण्याच्या सुमारास झाडाची फांदी पडली. यामध्ये त्या छताचे पत्रे तुटून किरकोळ नुकसान झाले आहे. या घटनांची माहिती मिळताच घटनास्थळी आपत्ती व्यवस्थापन कक्ष आणि अग्निशमन दलाच्या जवानांनी धाव घेत, पडलेल्या फांद्या कापून बाजूला केले अशी माहिती आपत्ती व्यवस्थापन कक्षाने दिली.