महापौरांच्या लसीकरणावर भाजपची पोस्टरबाजी

ठाणे : एकीकडे महापौर नरेश म्हस्के यांनी घेतलेल्या कोरोना लसीवरून आता राजकारण चांगलेच तापले आहे. भाजपने आता त्याचे भांडवल करून शहरभर पोस्टरबाजीतून महापौरांवर टीका केली आहे. कोरोनायोद्ध्यांना लस देणे गरजेचे असताना महापौरांचे लाड कशासाठी, असा सवाल या पोस्टरद्वारे केला आहे. दुसरीकडे एका डॉक्टरला मुदत संपल्याचे सांगून लस न देता पिटाळून लावल्याचा धक्कादायक प्रकारही समोर आल्याने भाजपच्या हातात आयतेच कोलीत मिळाले आहे.

कोरोनाच्या काळात झोकून देऊन कार्य न करता ठाणेकरांना वाऱ्यावर सोडणाऱ्या महापौर नरेश म्हस्के यांनी नियम डावलून स्वत: कोरोना लस घेतली. त्यांच्यासोबत शिवसेनेचे आमदार रवींद्र फाटक यांनी घेतलेली लस म्हणजे सत्तेचा गैरवापर असल्याचा आरोप भाजपने केला आहे. लस पूर्णपणे सुरक्षित आहे हे सर्वांना समजण्याकरिता ती घेतली असल्याचा महापौरांचा दावा आहे. मात्र, याबाबत सरकारी आदेश दाखवणार का, असा सवाल करून भाजपचे गटनेते मनोहर डुंबरे यांनी थेट केंद्रीय आरोग्यमंत्री डॉक्टर हर्षवर्धन यांना पत्र पाठवून या गैरप्रकाराकडे लक्ष वेधले आहे. तसेच ठाणे शहराला पुरवठा केलेली लस सत्तेचा गैरवापर करून आणखी कोणाला दिली आहे का, नक्की किती फ्रंटलाइन वर्कर्सना ती मिळाली, याची चौकशीची मागणी केली आहे. भाजप एवढ्यावरच थांबला नसून त्याने आता ठाण्यात पोस्टरबाजी करून महापौरांवर हल्लाबोल केला आहे.

महापौरांवर हल्लाबोल करणारे हे पोस्टर महापालिका मुख्यालयासमोरच लावल्याने अनेकांच्या नजरा त्यावर खिळल्या होत्या. कोरोनायोद्धे ठाण्याचा अभिमान, त्यांना सर्वप्रथम लस मिळणे हा त्यांचा अधिकार, सेना आमदार, महापौरांनी लाइनीत घुसून त्यांचा केला अपमान अशा आशयाचा मजकूर या पोस्टरवर आहे. शिवसेना -राष्ट्रवादी भाऊ भाऊ, दोघे मिळून जनतेच्या पैशांवर मजा मारू, असा आशयही पोस्टर झळकत आहे.