ठामपा शाळेतील विद्यार्थांना देण्यात येणाऱ्या चिक्क्यांमध्ये आळ्या

ठाणे : ठाणे महापालिकेच्या शाळेतील विद्यार्थ्यांना सकस आहारापोटी दिल्या जाणाऱ्या चिक्क्यांमध्ये अळ्या सापडल्याचा धक्कादायक प्रकार उघडकीस आला आहे. या चिक्क्यांचा पुरवठा करणाऱ्या गुन्हा दाखल करून त्याची सर्व देयके थांबविण्याची मागणी ठाणे शहर (जिल्हा) काँग्रेसने केली.

ठाण्यात महापालिकेच्या २०० हून अधिक शाळा असून, त्यातील सुमारे ४० हजार विद्यार्थ्यांना सकस आहारापोटी दररोज चिक्क्या दिला जात होत्या. कोविड काळात शाळा बंद असल्याने त्याचा पुरवठा बंद झाला होता. यावेळी राजकीय हस्तक्षेप करून या चिक्क्यांचा आठवड्यातून एकदा पुरवठा करण्याचा निर्णय ठामपाच्या शिक्षण मंडळाने घेतला होता.

ठामपाच्या बुधवारच्या स्थायी समितीच्या बैठकीत काँग्रेसचे जिल्हाध्यक्ष व नगरसेवक ॲड. विक्रांत चव्हाण यांनी याबाबत विषय मांडला होता. हे कंत्राट बेकायदा दिले असून, अटी-शर्तीनुसार दिलेला नसल्याचा आरोप चव्हाण यांनी केला. हा कारखानाही ठाण्याऐवजी सोलापूरमध्ये आहे. ठाण्यातील एका बेकायदा बंगल्यावर या चिक्क्यांचा सर्व साठा ठेवण्यात येतो. या ठिकाणी स्वच्छतेबाबत आवश्यक ती काळजी घेतली जात नसल्यामुळेच हा प्रकार घडल्याचा आरोप शहर काँग्रेसचे प्रवक्ते सचिन शिंदे यांनी केला आहे.

या कंत्राटदाराला ठिकठिकाणच्या शाळेतील विद्यार्थ्यांपर्यंत पोहोचविण्यासाठी प्रवास शुल्क दिले जात आहे. तेही बेकायदा असल्याची बाबही उघडकीस आली आहे. या चिक्क्यामध्ये आता चक्क अळ्या आढळल्या आहेत. याबाबत आयुक्तांची भेट घेऊन या कंत्राटदारावर त्वरित गुन्हा नोंदवावा आणि त्याची देयके त्वरित रोखण्याची मागणी करणार असल्याचेही शिंदे यांनी म्हटले आहे.

-----------------