फादर स्टॅन स्वामी मृत्यूप्रकरणी दोषींवर कारवाईसाठी निदर्शने

ठाणे : सामाजिक न्याय आणि आदिवासींसाठी आयुष्य वेचणारे फादर स्टेन स्वामी यांचे न्यायालयीन कस्टडीत असताना निधन झाले होते. ८५ वर्षीय स्टेन स्वामी आजारी असताना त्यांची गंभीर अवस्था होईपर्यंत त्यांना योग्य उपचार न दिल्याने एका प्रकारे हा शासन पुरस्कृत खूनच आहे, असा आरोप करून येथील जन आंदोलनांचा राष्ट्रीय समन्वयच्या पुढाकाराने विविध समविचारी संस्था संघटनांनी डॉ. बाबासाहेब आंबेडकर यांच्या पुतळ्याजवळ शुक्रवारी निदर्शने करून निषेध केला.

येथील कोर्टनाका येथे केलेल्या या निदर्शनात जन आंदोलनांचा राष्ट्रीय समन्वय, श्रमिक जनता संघ, इंटक, म्युज फाउंडेशन, भारतीय महिला फेडरेशन, बहुजन असंघटित मजदूर संघटना, एसआयपी, समता विचार प्रसारक संस्था, आरएमपीआय आदी संघटनांचे पदाधिकारी-कार्यकर्ते सहभागी झाले, असे एपीएमचे महाराष्ट्र समन्वयक जगदीश खैरालिया यांनी सांगितले.

सरकारविरोधातील आवाज दाबून अप्रत्यक्षपणे हुकूमशाही गाजवत असून केंद्र सरकार संविधान विरोधी भूमिका घेत असल्याचा आरोपही यावेळी करण्यात आला. फादर स्टॅन स्वामी यांच्या मृत्यूप्रकरणी सखोल चौकशी करून दोषींवर कठोर कारवाई करावी, यूएपीए आणि राजद्रोहाच्या आरोपाखाली जेलमध्ये डांबले गेलेले निरपराध कार्यकर्ते यांच्या बाबतीत योग्य व तातडीच्या न्यायालयीन प्रक्रिया पूर्ण करून ताबडतोब जामीन मंजूर करावा, यूएपीए सारखे सैतानी कायदे रद्द करावेत, संविधान बचाओ - देश बचाओ अशा मागण्यांचे निवेदन भारताचे राष्ट्रपती रामनाथ कोविंद यांना ठाण्याचे निवासी जिल्हाधिकारी शिवाजी पाटील यांच्यामार्फत शुक्रवारी देण्यात आले. यावेळी भेटलेल्या खैरालिया यांच्यासह सचिन शिंदे, लक्ष्मी छाया पाटील, टी. ललिता, निर्मला पवार, सुब्रतो भट्टाचार्य, अजय भोसले, धोंडिराम खराटे, सुनील दिवेकर, उमाकांत पावसकर, लिलेश्वर बनसोड, भास्कर गव्हाळे, ओंकार गरड आदी कार्यकर्ते होते.

------