भिवंडीत केमिकल गोदामाला भीषण आग, परिसरात पसरले धुराचे लोट

तीन गोदाम आगीच्या भक्ष्यस्थानी पडले आहेत.

भिवंडी: तालुक्यातील राहनाळ ग्रामपंचायत हद्दीत असलेल्या गोविंद कंपाउंड येथे केमिकल गोदामाला भीषण आग लागल्याची घटना रविवारी घडली आहे. ही आग लगतच्या प्रियदर्शनी कंपाऊंडमधील चप्पलच्या गोदामांपर्यत पोहचल्याने या आगीत केमिकल साठवून ठेवलेल्या दोन गोदामासह चप्पलचे गोदाम असे तीन गोदाम आगीच्या भक्ष्यस्थानी पडले आहेत.

भिवंडी शहर व ग्रामीण भागात दिवसाआड लहान मोठ्या आगीच्या दुर्घटना घडतच आहेत.त्यातच आज दुपारच्या सुमारास राहनाळ ग्रामपंचायत हद्दीत असलेल्या गोवींद कंपाऊंड मधील एका गोदामात ठेवण्यात आलेल्या केमिकलला अचानक आग लागल्याने या आगीमुळे लगतच्या केमिकल गोदामात साठवून ठेवलेल्या केमिकलने क्षणातच मोठा पेट घेऊन दोन्ही गोदाम आगीच्या भक्ष्यस्थानी पडले.ही आग पसरत केमिकल गोदामा लगत असलेल्या एका चप्पलचे गोदामा पर्यंत पसरल्याने ते गोदाम ही आगीच्या भक्ष्यस्थानी पडले. 

भिवंडी अग्निशामक दलाच्या तीन गाड्या घटनास्थळी दाखल झाल्या असून अग्निशामक दलाचे जवान आगीवर नियंत्रण मिळविण्यासाठी शर्तीचे प्रयत्न करीत असून सध्या आग नियंत्रणात आली आहे.सुदैवाने या दुर्घटनेत आतापर्यत कोणतीही जीवितहानी झाली नाही.