अंबरनाथ : कोरोनाकाळात सर्वसामान्य नागरिकांसोबतच कलाकारांचेदेखील जगणे मुश्कील झाले आहे. त्याअनुषंगाने अंबरनाथ येथील शिवसेनेचे माजी नगराध्यक्ष सुनील चौधरी यांनी कलाकारांसाठी मदतीचा हात पुढे केला. मात्र, ही मदत करताना त्यांनी कोणताही गाजावाजा केला नाही, मदत करतानाची साधी छायाचित्रेही काढली नाहीत.
टाळेबंदीचा फटका सर्वसामान्य कलाकारांनादेखील बसला आहे. चित्रपट, मालिका, जाहिराती यांचे चित्रीकरण बंद असल्याने कलाकारांसमोर मोठा आर्थिक प्रश्न उभा राहिला आहे. लेखक, वादक आणि अभिनय क्षेत्राशी निगडित असलेली मंडळी यांच्यासमोर मोठी आर्थिक विवंचना निर्माण झाली होती. त्यामुळे माजी नगराध्यक्ष सुनील चौधरी यांच्या माध्यमातून शहरातील कलाकारांना अन्नदान, धान्य व इतर वस्तूंची मदत करण्यात आली. अंबरनाथच्या अंबर रोटरी भवन येथे कार्यक्रमाचे आयोजन करण्यात आले होते. विशेष म्हणजे कलाकारांना मदत देत असताना त्याचे कोणतेही छायाचित्र किंवा व्हिडीओ चित्रीकरण करण्यात आले नाही. कार्यक्रमस्थळी एका ठिकाणी ही मदत ठेवण्यात आली होती. त्यानंतर व्यासपीठावरील सर्व मान्यवर उठून बाजूला गेले आणि कलाकारांनी स्वेच्छेने येऊन ही मदत घेतली. कार्यक्रमाला शिवसेनेचे उपशहरप्रमुख परशुराम पाटील, सुनील चौधरी, माजी नगरसेवक सुभाष साळुंखे, निखिल चौधरी यांच्यासह अनेक कार्यकर्ते उपस्थित होते.
---------------