धक्कादायक! पाच हजारांमध्ये दिली होती पत्नीच्या हत्येची सुपारी: फरारी आरोपीस २० वर्षांनी अटक

तब्बल २० वर्षांपूर्वी पाच हजारांची सुपारी घेऊन एका महिलेची हत्या करणाऱ्या शंभू मनुभाई रावल (४६) याला ठाणे गुन्हे अन्वेषण विभागाच्या युनिट एकने गुरुवारी अटक केली आहे. त्याने अन्य एका साथीदाराच्या मदतीने कुंदा (३५ ) या महिलेची हत्या केली होती.

ठळक मुद्देठाणे गुन्हे शाखेची कारवाई गुजरात येथून घेतले ताब्यात

लोकमत न्यूज नेटवर्क
ठाणे: आपल्याच पत्नीच्या हत्येसाठी पाच हजारांची सुपारी देऊन तिची हत्या घडवून आणल्याचा प्रकार २० वर्षांपूर्वी ठाण्याच्या वागळे इस्टेट येथे घडला होता. याच खूनातील एक आरोपी शंभू मनुभाई रावल (४६, रा. गवाडा, जि. मेहसाना, गुजरात) याला तब्बल २० वर्षांनी गुजरात राज्यातील मेहसाना जिल्ह्यातून ठाणे गुन्हे शाखेच्या युनिट एकच्या पथकाने गुरुवारी अटक केली आहे. त्याने अन्य एका साथीदाराच्या मदतीने कुंदा (३५ ) या महिलेची हत्या केली होती.
ठाण्यातील वागळे इस्टेट, रघुनाथनगर भागात राहणारी कुंदा रावल आणि तिचा पती कुंदन रावल यांच्यात नेहमीच खटके उडत होते. या नेहमीच्या भांडणाला कंटाळून कुंदन याने आपल्याच पत्नीची हत्या करण्यासाठी शंभू आणि सुरेश मनीलाल नाव्ही या दोघांना पाच हजार रु पयांची सुपारी २००० मध्ये दिली होती. त्यानंतर दोघांनी मिळून कुंदाची हत्या करून पलायन केले होते. याप्रकरणी वागळे इस्टेट पोलीस ठाण्यात दोघांविरुद्ध खूनाचा गुन्हा दाखल झाला होता. दोघेही आरोपी गेली २० वर्ष फरार होते. दरम्यान, आरोपी शंभू रावल हा त्याच्या गुजरात राज्यातील मूळ गावी वास्तव्यास असल्याची माहिती ठाणे गुन्हे शाखा युनिट एकचे पोलीस हवालदार संभाजी मोरे यांना मिळाली होती. त्यानुसार युनिट एकचे पोलीस सहायक पोलीस निरीक्षक समीर अहिरराव आणि उपनिरीक्षक दत्तात्रय सरक यांच्या पथकाने गुजरात पोलिसांच्या मदतीने मदतीने शंभू याला १५ आॅक्टोबर रोजी गवाडा ( जि. मेहसाना ) येथून ताब्यात घेतले. याच खूनातील दुसरा आरोपी सुरेश मनीलाल नाव्ही हा मात्र ५ डिसेंबर २०१५ मध्ये मृत पावल्याची माहिती चौकशीमध्ये त्याने या पथकाला दिली.