ठाण्यात पूर्ववैमनस्यातून कोपरीत गुंडावर दोघा भावांनी केले चॉपरने वार

पूर्ववैमनस्यातून दारुच्या नशेत दीपक उर्फ दीपू रेवणकर या गुंडाच्या पोटात चॉपरचे वार करुन खूनाचा प्रयत्न केल्याची घटना मंगळवारी पहाटे १ वाजण्याच्या सुमारास सिद्धार्थनगर भागात घडली. या हल्ल्यानंतर दोघांनीही पलायन केले आहे.

ठळक मुद्दे कोपरी पोलीस ठाण्यात गुन्हा दाखल हल्ल्यानंतर दोघांचेही पलायन

लोकमत न्यूज नेटवर्क
ठाणे: पूर्ववैमनस्यातून दीपक उर्फ दीपू रेवणकर (२५, रा. सिद्धार्थनगर, कोपरी, ठाणे) या गुंडावर कोपरीतील सिद्धार्थनगर भागात दोन भावांनी पोटावर चॉपरचे वार करुन खूनाचा प्रयत्न केल्याची घटना मंगळवारी पहाटे १ वाजण्याच्या सुमारास घडली. याप्रकरणी कोपरी पोलीस ठाण्यात खूनाचा प्रयत्न केल्याचा गुन्हा दाखल करण्यात आला आहे.
कोपरीतील सिद्धार्थनगर भागातून २२ सप्टेंबर रोजी पहाटे १ वाजण्याच्या सुमारास रेवणकर हा जात होता. त्यावेळी त्याचा विशाल चेकालिया (२०) आणि विकास चेकालिया (१७) या दोन्ही भावांशी वाद झाला. याच वादाचे पर्यवसन हाणामारीत झाले. त्याचवेळी विशालने रेवणकर याच्या पोटात चाकूने वार केले. तर विकासने लोखंडी सळईने त्याच्यावर हल्ला केला. या हल्ल्यामुळे तो रक्ताच्या थारोळयात खाली कोसळला. त्याला गंभीर जखमी अवस्थेत त्याच्या भावाने एका खासगी रुग्णालयात उपचारासाठी दाखल केले आहे. दोन्ही भावांनी जुना वाद उकरुन त्याच्याशी भांडणे केल्याचा आरोप आहे. तर रेवणकर याच्यावरही कोपरी पोलीस ठाण्यात याआधी हाणामारीचे अनेक गुन्हे दाखल आहेत. या हल्ल्यानंतर विकास आणि विशाल हे दोघेही पसार झाले असून त्यांचा शोध घेण्यात येत असल्याचे वरिष्ठ पोलीस निरीक्षक जितेंद्र आगरकर यांनी सांगितले. जमादार तुकाराम डुंबरे हे याप्रकरणी अधिक तपास करीत आहेत.