ओबीसी आरक्षणासाठी भाजप रस्त्यावर; महाविकास आघाडीविरोधात घोषणाबाजी

वाशिम : राज्यात महाविकास आघाडी सरकारने ओबीसी आरक्षणासंदर्भात योग्य पावले उचलले नसल्याचा आरोप करीत ओबीसी समाजाला हक्काचे आरक्षण परत मिळवून देण्यासाठी भारतीय जनता पार्टीने १५ सप्टेंबर रोजी वाशिमसह जिल्ह्यात जिल्हाध्यक्ष आमदार राजेंद्र पाटणी, प्रदेश कार्यकारिणी सदस्य राजू पाटील राजे यांच्या नेतृत्वात चक्का जाम आंदोलन केले. यावेळी पोलिसांनी शेकडो कार्यकर्त्यांना स्थानबद्ध केले.

महाविकास आघाडी सरकारच्या उदासीनतेमुळे स्थानिक स्वराज्य संस्थांमधील ओबीसींचे आरक्षण संपुष्टात आले. राज्यात देवेंद्र फडणवीस यांच्या नेतृत्वातील सरकारने ओबीसी आंदोलन कायम राहावे यासाठी प्रक्रिया सुरू केली होती. परंतु, त्यानंतर सत्तेवर आलेल्या महाविकास आघाडी सरकारने ही प्रक्रिया ठप्प पाडली. न्यायालयात भक्कमपणे बाजू मांडली नाही, ओबीसी समाजाची संख्या निर्धारित करण्यासाठी मागासवर्गीय आयोग स्थापन केला; परंतु आयोगाला निधी दिला नाही, कर्मचारी दिले नाहीत. राज्य सरकारने ओबीसी समाजावर अन्याय केला, आदी आरोप करीत याविरोधात भारतीय जनता पार्टीने एल्गार पुकारला. जिल्ह्यात सर्व तालुकास्तरांवर जिल्हाध्यक्ष आमदार राजेंद्र पाटणी यांच्या नेतृत्वात चक्का जाम आंदोलन केले. वाशिम शहरातील पुसद नाका परिसरात तब्बल तासभर रस्ता रोखून भाजपच्या कार्यकर्त्यांनी महाविकास आघाडीचा निषेध नोंदविला. यावेळी राजू पाटील राजे, जिल्हा महामंत्री नागेश घोपे, ओबीसी मोर्चाचे जिल्हाध्यक्ष संतोष मुरकुटे, तालुकाध्यक्ष प्रल्हाद गोरे व शहराध्यक्ष राहुल तुपसांडे, अंबादास कालापाड, रामप्रसाद सरनाईक, अनिल ताजणे, शरद चव्हाण, नागोराव वाघ, धनंजय हेंद्रे, धनंजय रणखांब, धनाजी सारस्कर, गणेश खंडाळकर, सुनील तापडिया, सुनील चौधरी, डिगांबर खोरणे, जिल्हा परिषद सदस्या अर्चना खोरणे, अंजली पाठक, भावना सरनाईक, करुणाताई कल्ले, नीतेश मलिक यांसह भाजप पदाधिकारी व कार्यकर्ते सहभागी झाले होते.

०००००

घोषणाबाजीने पुसद नाका दणाणला

वाशिम शहरातील पुसद नाका परिसरात सुमारे तासभर रास्ता रोको आंदोलन केले. यामुळे दोन्ही बाजूंनी वाहतूक प्रभावित झाली होती. यावेळी आघाडी सरकारविरोधात प्रचंड घोषणाबाजी करण्यात आल्याने परिसर दणाणून गेला होता.