औरंगाबाद-नागपूर द्रुतगती मार्गावर अज्ञात वाहनाच्या धडकेने एकजण जागीच ठार

Accident News : गजानन शामा चव्हाण (३५) याचा मृतदेह शिरपूर पोलीस स्टेशनच्या हद्दीत येणाऱ्या चांडस येथे नागपूर-औरंगाबाद द्रुतगती मार्गावर आढळून आला.

लोकमत न्यूज नेटवर्क
शिरपूर जैन : औरंगाबाद-नागपूर द्रुतगती मार्गावर असलेल्या चांडस गावानजीक अज्ञात वाहनाने जबर धडक दिल्याने एकजण जागीच ठार झाला. ही घटना ७ जून रोजी सकाळी उघडकीस आली.
प्राप्त माहितीनुसार, डोंगरकिन्ही येथील रहिवासी गजानन शामा चव्हाण (३५) याचा मृतदेह शिरपूर पोलीस स्टेशनच्या हद्दीत येणाऱ्या चांडस येथे नागपूर-औरंगाबाद द्रुतगती मार्गावर आढळून आला. त्यास अज्ञात वाहनाने धडक दिली असल्याची तक्रार नातेवाइकांनी शिरपूर पोलिसात दाखल केली. 
तत्पूर्वी बिट जमादार राजू वानखेडे, कृष्णा नागरे यांनी घटनास्थळी जाऊन पंचनामा केला व मृतदेह उत्तरीय तपासणीसाठी मालेगाव ग्रामीण रुग्णालयाकडे पाठविण्यात आला. घटनेचा पुढील तपास पोलीस निरीक्षक सुनील वानखेडे यांचा मार्गदर्शनाखाली शिरपूर पोलीस करीत आहे.
(वार्ताहर)