Maharashtra Politics: “थोरातसाहेब, तुमच्यात हिंमत असेल तर तुम्ही याप्रकरणी माफी मागा”; आशिष शेलारांचे आव्हान

Maharashtra News: नेमकं प्रकरण काय?

Maharashtra Politics: राज्यातील अर्थसंकल्पीय अधिवेशन शेवटच्या टप्प्यात आहे. विविध मुद्द्यांवरून सत्ताधारी आणि विरोधक आमने-सामने आल्याचे पाहायला मिळत आहेत. यातच आता काँग्रेस खासदार राहुल गांधी यांनी स्वातंत्र्यवीर सावरकर यांच्याबाबत केलेल्या विधानाचे पडसाद विधानसभेत उमटले. यावरून सत्ताधारी आक्रमक झाले आणि राहुल गांधी यांनी यावरून माफी मागितली पाहिजे, अशी मागणी लावून धरली. यावेळी भाजप सदस्य आशिष शेलार यांनी काँग्रेस नेते बाळासाहेब थोरात यांना थेट आव्हान दिले. 

सावरकरांचा अपमान आम्ही सहन करणार नाही. अध्यक्ष महोदय, आम्ही यावेळी राहुल गांधी यांच्याविरोधात ठराव मांडू इच्छितो, त्याला परवानगी द्या, अशी विनंती शिवसेना शिंदे गटाचे सदस्य संजय शिरसाट यांनी केली. यावर विधानसभा अध्यक्ष काही बोलणार इतक्यात आमदार आशिष शेलार यांनी माफीची मागणी लावून धरली. यानंतर झालेल्या गोंधळामुळे राहुल नार्वेकर यांनी सभागृहाचे कामकाज १० मिनिटांसाठी स्थगित केले. 

थोरातसाहेब, तुमच्यात हिंमत असेल तर तुम्ही याप्रकरणी माफी मागा

राहुल गांधी यांनी भारताबाहेर जाऊन भारताचा अपमान केला. त्यानंतर स्वातंत्र्यवीर सावरकरांचा अपमान केला. याबद्दल राहुल गांधी यांनी माफी मागितली पाहिजे, अशी मागणी करत आशिष शेलार यांनी काँग्रेस नेत्यांकडे माफीची मागणी केली. शेलार काँग्रेस आमदार बाळासाहेब थोरातांना म्हणाले की, बाळासाहेब थोरात, तुमच्यात हिंमत असेल तर तुम्ही याप्रकरणी माफी मागा. एका बाजूला संजय शिरसाट आणि दुसऱ्या बाजूने आशिष शेलार राहुल गांधी यांच्या वक्तव्यावरून आक्रमक झाले होते.

राहुल गांधींच्या विधानाला काँग्रेस आमदारांचा पाठिंबा आहे का?

या काँग्रेसने बाबासाहेब आंबेडकरांना निवडणुकीत पाडले होते. ही तीच काँग्रेस आहे. आमच्या काँग्रेसमधील जुन्या सहकाऱ्यांनी आणि काँग्रेस आमदारांनी सांगावे की, राहुल गांधी यांनी केलेल्या वक्तव्याला तुमचा पाठिंबा आहे का? सावरकरांनी देशाच्या स्वातंत्र्यलढ्यात मोठे योगदान दिले आहे. त्यांच्याबद्दलचे असे वक्तव्य आम्ही ऐकून घेणार नाही. या काँग्रेसने दहशतवादी अजमल कसाबचा उदो उदो केला, त्याला बिर्याणी चारली. त्यांचा राहुल गांधींच्या वक्तव्याला पाठिंबा असेल तर त्याने आम्हाला काही फरक पडत नाही, असे संजय शिरसाट यावेळी म्हणाले.

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"