लसीकरणाची 'ऑनलाईन नोंदणी' करताना सावधान, पोलिसांचा सूचक इशारा

महाराष्ट्र सायबर पोलीस विभागाकडून एक संदेश जारी करण्यात आला असून नागरिकांना फेक अॅप आणि शासनमान्य नसलेल्या कुठल्याही इंटरनेट प्रणालीशी आपली खासगी माहिती शेअर न करण्याचे सूचविण्यात आले आहे.

राज्यात एप्रिलच्या पहिल्या आठवड्यात लसीकरणाने गती पकडली होती. मात्र, मागणीनुसार लस उपलब्ध होत नसल्याने महिन्याच्या मध्यावधीच लशींचा तुटवडा जाणवू लागला.

1 मे पासून 18 ते 44 वर्षांच्या नागरिकांना लस देण्यात येऊ लागल्याने पुन्हा मे महिन्यात पहिल्या आठवडयात लशींचा आकडा पुन्हा खाली आला.

एकीकडे पुरेशा प्रमाणात लस उपलब्ध होत नाही. दुसरीकडे लसीकरण केंद्रांवर लोकांच्या रांगा लागत आहेत. केंद्रावर किती डोस उपलब्ध आहेत, याची माहितीही नसल्याने गोंधळाचे वातावरण आहे.

ज्येष्ठ नागरिकांना तासन-तास रांगेत राहूनही लस मिळत नाही. त्यामुळे मनस्ताप सहन करावा लागतो. तर, अनेकदा लस मिळविण्यासाठी हेलपाटे मारावेल लागत आहेत.

लसीकरण केंद्रावरील गर्दी पाहता, सोशल डिस्टन्सचा फज्जा उडत असून विशेष म्हणजे ज्येष्ठ नागरिकांचीच मोठी गर्दी होताना दिसत आहे.

पहिला डोस घेऊन सात-आठ आठवड्यांचा कालावधी संपलेल्यांची, दुसरा डोस मिळावा यासाठी भटकंती सुरू आहे. त्यातच, नियोजित माहितीही न मिळाल्याने नागरिक त्रस्त होताना दिसत आहे.

अनेकजण लसीकरण केंद्रावर चौकशीसाठी येतात. परंतु लस कधी उपलब्ध होणार याबाबत केंद्रावरील कर्मचाऱ्यांना माहिती नसल्याने लसीकरणाबाबत संभ्रमाचे वातावरण आहे.

लस उपलब्ध झाल्यानंतर दुसरा डोस मिळेल, असे सांगितले जाते. पण लस कधी उपलब्ध होईल, याबाबत शाश्वती नसल्याने स्थानिक प्रशासनाचीही कोंडी होत आहे.

दुसरीकडे लशींसाठी होणारी गर्दी पाहता, काही समाजकंटकांकडून फेक अॅप बनवून बोगस नोंदणीद्वारे नागरिकांची फसवणूक करण्यात येत आहे. त्यामुळे, पोलिसांनी सावधानतेचा इशारा दिला आहे.

महाराष्ट्र सायबर पोलीस विभागाकडून एक संदेश जारी करण्यात आला असून नागरिकांना फेक अॅप आणि शासनमान्य नसलेल्या कुठल्याही इंटरनेट प्रणालीशी आपली खासगी माहिती शेअर न करण्याचे सूचविण्यात आले आहे.