मुंबई: हार्बर रेल्वे मार्गावर लोकलचे 6 डबे रूळांवरून घसरले

हार्बर रेल्वे मार्गावर शुक्रवारी सकाळी लोकलचे ६ डबे रूळांवरून घसरले.

सकाळी पावणेदहाच्या सुमारास माहीमजवळ ही दुर्घटना घडली.

ही लोकल सीएसटीहून अंधेरीच्या दिशेने जात होती. लोकलचे डबे माहिमजवळ ट्रॅक क्रॉस करताना रुळावरुन घसरले.

ही लोकल ५ नंबरच्या प्लॅटफॉर्मवर येणार होती, त्यासाठी ७ नंबरच्या प्लॅटफॉर्मला जोडणाऱ्या ट्रॅकवरुन ५ नंबरच्या ट्रॅकवर जाताना लोकलचे सहा डबे रुळांवरून खाली घसरले.

यात एका महिलेसह सहा प्रवासी जखमी झाले आणि हार्बर मार्गावरील वाहतूक ठप्प झाली होती.

गणेश चतुर्थीमुळं सुट्टीचा दिवस असल्यानं लोकलला फारशी गर्दी नसली तरी लोकल गाड्यांमधून गणपती घरी आणणाऱ्या भाविकांची मोठी गैरसोय झाली.