Cylinder Blast: मुंबईत कमर्शियल सेंटरमध्ये भीषण स्फोट; आवाजानं वरळी हादरली, पाहा फोटो

वरळीच्या जुना पासपोर्ट कार्यालयावरील मनीष कमर्शियल सेंटरमध्ये ५ व्या मजल्यावर भीषण स्फोट झाल्याची घटना घडली आहे. हा स्फोट इतका भयंकर होता की त्याच्या हादऱ्याने इमारतीच्या स्लॅबचा काही भागही कोसळला.

प्राथमिक माहितीनुसार एसी सिलिंडर स्फोट झाल्याची माहिती आहे. घटनेची माहिती मिळताच पोलीस आणि अग्निशमन दलाच्या जवानांनी इमारत ताब्यात घेऊन ती रिकामी केली आहे.

शुक्रवारी सकाळी ८.५५ वाजण्याच्या सुमारास वरळी येथील अ‍ॅनी बेसेंट रोडवरील मनीष कमर्शियल सेंटरच्या इमारतीत ही घटना घडली. या अपघातात सुचिता कौर (३०) किंचित जखम्या झाल्या आहेत.

सुचिताच्या हाताला आणि डोक्याला दुखापत झाल्याने त्याला जवळच्या सरकारी रुग्णालयात उपचारासाठी दाखल केले गेले. पोलिसांनी संपूर्ण परिसर रिकामा केला आहे. सिलिंडरचा स्फोट झाल्याने खिडकीच्या काचा मोठ्या प्रमाणात रस्त्यावर पडल्या.

इतकचं नव्हे तर स्फोटामुळे इमारतीच्या स्लॅबचा काही भाग रस्त्यावर आल्याने वाहतुकीसही अडचण निर्माण झाली. सुदैवाने या भीषण स्फोटात कोणतीही जीवितहानी झाली नाही.

स्फोटाच्या हादऱ्यामुळे इमारतीच्या काचा मोठ्या प्रमाणात फुटल्या. सध्या इमारतीच्या आसपास पोलीस आणि अग्निशमन दलाच्या कर्मचाऱ्यांनी ताबा घेतला आहे.

पोलीस या घटनेची चौकशी करुन असून स्थानिक आमदार पर्यावरण मंत्री आदित्य ठाकरे हेदेखील घटनास्थळी येणार असल्याची माहिती आहे.