घोसपुरीत वीज पडून १४ शेळ्यांचा मृत्यू

केडगाव (जि. अहमदनगर) : नगर तालुक्यातील घोसपुरी येथे सोमवारी दुपारी वीज पडून दोन शेतकऱ्यांच्या १४ शेळ्यांचा मृत्यू झाला. प्रशासनाने पंचनामा केला असून, शेतकऱ्यांना भरपाई मिळावी अशी मागणी होत आहे.

नगर तालुक्यात गेल्या तीन-चार दिवसांपासून ढगाळ हवामान आहे. अनेक ठिकाणी हलक्या पावसाने हजेरीही लावली. काही गावात जोराचा वारा वाहत आहे. घोसपुरीतील बाळासाहेब दातीर व भगवान बुलाखे हे आपल्या शेळ्या चारण्यासाठी माळरानावर गेले होते. दुपारी दोनच्या सुमारास विजांचा कडकडाट सुरू झाला. वीज शेळ्यांवर पडल्याने या दोन्हीही शेतकऱ्यांच्या मिळून १४ शेळ्या जागेवरच मृत्युमुखी पडल्या. दातीर व बुलाखे हे दोघेही शेळ्या पालन करून आपला उदरनिर्वाह करतात. जिल्हा परिषद सदस्य संदेश कार्ले यांनी प्रशासनाला याची माहिती दिल्याने तलाठी व पशुसंवर्धन विभागातील अधिकाऱ्यांनी मृत शेळ्यांचा पंचनामा केला. या दोन्ही शेतकऱ्यांची आर्थिक परिस्थिती नाजूक असल्याने त्यांना भरपाई मिळावी, अशी मागणी गावकऱ्यांनी केली आहे.