वडारवाडीत १३ जागांसाठी ४० जणांची जोरात तयारी!

भिंगार : भिंगारलगतच्या वडारवाडी ग्रामपंचायतीमध्ये निवडणुकीची जोरदार तयार सुरू आहे. या ग्रामपंचायतीमध्ये पाच वाॅर्ड असून, १३ जागा आहेत. या १३ जागांसाठी तब्बल ४० ते ४२ इच्छुकांनी तयारी केली आहे.

जिल्हाभरात अनेक ग्रामपंचायतींनी बिनविरोध निवडणुकींसाठी तयारी चालविली आहे. मात्र, वडारवाडी ग्रामपंचायतीमध्ये इच्छुकांची संख्या अर्धशतकाकडे झुकली असून, सर्वांनीच निवडणुकीची जोरात तयारी चालविली आहे. या ग्रामपंचायतीच्या हद्दीतला काही भाग जनरल वैद्य काॅलनीमध्ये येतो. विशेष म्हणजे या ग्रामपंचायतीला गावठाण नाही. ग्रामपंचायतीचा विकासही झालेला नसून, अनेक समस्या नागरिकांच्या मानगुटीवर बसलेल्या आहेत. ग्रामपंचायत सदस्यही विकास कामांकडे दुर्लक्ष करीत असल्यामुळे येथील ग्रामस्थ प्रचंड नाराज आहेत. त्यांना निवडणुकीत नागरिकांच्या रोषाला सामोरे जावे लागणार आहे. या पार्श्वभूमीवर आगामी निवडणुकीनंतर वडारवाडी ग्रामपंचायत हद्दीमध्ये अस्तित्वात येणारे सदस्य ग्रामस्थांच्या हालअपेष्टा दूर करणार का, असा सवालही उपस्थित केला जात आहे.