अल्पवयीन मुलीवर अत्याचार

अहमदनगर : अवघ्या सहा वर्षांच्या बालिकेवर अत्याचार करून पसार झालेल्या संशयित आरोपीला नगर तालुका पोलिसांनी बुधवारी करमाळा परिसरातून अटक केली. भाऊसाहेब बाळू माळी (रा. चिचोंडी पाटील, ता. नगर) असे अटक केलेल्या आरोपीचे नाव आहे.

नगर तालुक्यातील एका गावात चार दिवसांपूर्वी आरोपीने सदर अल्पवयीन मुलीस निर्जन ठिकाणी नेऊन तिच्यावर अत्याचार केला होता. याबाबत नगर तालुका पोलीस ठाण्यात आरोपीविरोधात गुन्हा दाखल झाला होता. आरोपी माळी हा करमाळा तालुक्यातील दिवेगव्हाण (जि. सोलापूर) परिसरात लपला असल्याची माहिती सहायक पोलीस निरीक्षक राजेंद्र सानप यांना मिळाली होती. माहितीनुसार पोलिसांनी तपास करून आरोपीला अटक केली. जिल्हा पोलीस अधीक्षक मनोज पाटील यांच्या मार्गदर्शनाखाली सहायक पोलीस निरीक्षक सानप, उपनिरीक्षक डी.आर. जारवाल, पोलीस नाईक अशोक मरकड कॉन्स्टेबल सोमनाथ घावटे, सचिन वनवे, बाळू कदम, रवी सोनटक्के, दीपक शिंदे यांचा समावेश असलेल्या पथकाने ही कारवाई केली.