अल्पवयीन मुलीवर सामूहिक अत्याचारप्रकरणी आरोपींना अटक

१९ जानेवारी २०२१ रोजी १७ वर्षीय अल्पवयीन मुलीच्या वडिलांनी लोणी पोलीस स्टेशनला फिर्याद दिली होती. अनिकेत दत्तात्रेय सकट (वय २० वर्ष, रा.प्रसादनगर, राहुरी फॅक्टरी) याने मुलीस पळून नेल्याची माहिती समोर आली. पोलिसांनी सकट याचा माग काढला असता तो मुलीसोबत सुरत (गुजरात) येथे असल्याचे समजले. मात्र पोलीस पथक त्याच्यापर्यंत पोहचण्याआधीच तो या ठिकाणाहून मुलीसह फरार झाला. त्यानंतर २७ फेब्रुवारी २०२१ ला तो मुलीसह मिरजगाव (जि. अहमदनगर) येथे असल्याचे समजताच पोलिसांनी त्याला ताब्यात घेतले. त्यांनतर या मुलीने तिच्याबरोबर घडलेला सर्व प्रकार पोलिसांना सांगितला. अनिकेत दत्तात्रय सकट याने माझ्यावर अत्याचार केला. दरम्यानच्या काळात त्याचे ओळखीचे मित्र चंदन सत्यदेव यादव, मोनालाल हिरालाल यादव, विकास ओमप्रकाश सिंह (रा.उत्तर प्रदेश) यांनी मला व अनिकेतला दारू पाजून अत्याचार केला. हा गुन्हा सुरत शहरामध्ये घडला. बुधवारी २६ मे रोजी या आरोपींना अटक करण्यात पोलिसांना यश आले.

या आरोपीविरुद्ध लोणी पोलीस स्टेशनला गुन्हा दाखल करण्यात आला आहे. पुढील तपास जिल्हा पोलीस अधीक्षक मनोज पाटील, अप्पर पोलीस अधीक्षक डॉ. दीपाली काळे, उपविभागीय पोलीस अधिकारी संजय सातव यांच्या मार्गदर्शनाखाली लोणी पोलीस स्टेशनचे सहाय्यक पोलीस निरीक्षक समाधान पाटील करत आहेत.