गरज लागल्यास निळवंडेसाठी वाढीव निधी देणार

जलसंपदामंत्री पाटील यांनी शनिवारी (दि. २२) संगमनेर तालुक्यातील जवळे कडलग येथील निळवंडे धरणाच्या कालव्यावरील आढळा सेतू पुलाची पाहणी करत कालव्यांच्या कामाचा आढावा घेतला. त्यानंतर पत्रकारांशी त्यांनी संवाद साधला. त्यांच्यासमवेत महसूलमंत्री बाळासाहेब थोरात, ऊर्जा राज्यमंत्री प्राजक्त तनपुरे, आमदार डॉ. सुधीर तांबे, जिल्हा परिषद सदस्य अजय फटांगरे, रामहरी कातोरे, राष्ट्रवादी युवक काँग्रेसचे जिल्हाध्यक्ष कपील पवार, जिल्हा बँकेेचे माजी अध्यक्ष, विद्यमान संचालक सीताराम गायकर, जलसंपदा विभागाचे मुख्य अभियंता डॉ. संजय बेलसरे, अधीक्षक अभियंता अरुण नाईक, लाभक्षेत्र अधीक्षक अभियंता अलका अहिरराव, संगमनेर विभागाचे उपविभागीय अधिकारी डॉ. शशिकांत मंगरुळे, कार्यकारी अभियंता गिरीश सांगानी, प्रमोद माने, संगीता जगताप, गणेश नानोर आदी उपस्थित होते.

पाटील म्हणाले, निळवंडे धरणाच्या कालव्यांच्या संदर्भाने अर्थसंकल्पात पहिल्यांदाच मोठी तरतूद केली आहे. कोरोनाच्या संकटात आर्थिक अडचणी असल्या तरी देखील कालव्यांची कामे होणे महत्त्वपूर्ण आहे. कामांना सतत गती मिळाली पाहिजे. अहमदनगर जिल्ह्यातील शेतकऱ्यांसाठी निळवंडे धरण हा अतिशय महत्त्वाचा प्रकल्प आहे. या प्रकल्पातील अडथळे दूर करत प्रकल्पाचे काम लवकरात लवकर पूर्ण व्हावे, यासाठी महाविकास आघाडी सरकार प्रयत्नशील आहे. कालव्यांची कामे प्राधान्याने पूर्ण झाल्यास जिल्ह्यातील चार-पाच तालुक्यांतील पाण्याचा प्रश्न कमी होणार आहे.

-----------------

पिढ्यांपासूनची मागणी आता पूर्ण होतेय

निळवंडे धरणाचे काम पूर्ण होण्याची काही पिढ्यांपासूनची मागणी पूर्ण होते आहे. धरणाचे कालवे पूर्ण करून दुष्काळी भागाला पाणी देणे हा आपल्या जीवनाचा अविभाज्य भाग आहे. ज्या-ज्या वेळेस आम्हाला संधी मिळाली. त्यावेळेस निळवंडे धरणाच्या कामाला गती दिली आहे. निळवंडे धरणाच्या कालव्यांची कामे पूर्ण होण्याकरिता जलसंपदामंत्री जयंत पाटील यांची मदत होते आहे. कालव्यांच्या कामांसाठी निधी देखील चांगला उपलब्ध होतो आहे. त्यासाठी आमचा सर्वांचा पाठपुरावा सुरू आहे. याचा परिणाम २०२२ च्या पावसाळ्यातील पाणी लाभक्षेत्रातील शेतकऱ्यांना मिळेल, असा आमचा विश्वास आहे.

- बाळासाहेब थोरात, महसूलमंत्री

.......फोटो आहे......