Ahmednagar: सामाजिक कार्यकर्ते हेरंब कुलकर्णी यांच्यावर अज्ञातांकडून प्राणघातक हल्ला

Heramb Kulkarni: सामाजिक कार्यकर्ते व विचारवंत हेरंब कुलकर्णी यांचेवर शनिवारी अहमदनगर शहरात प्राणघातक हल्ला झाला आहे. त्यात त्यांच्या डोक्यावर वार करण्यात आले आहेत.

अहमदनगर - सामाजिक कार्यकर्ते व विचारवंत हेरंब कुलकर्णी यांचेवर शनिवारी अहमदनगर शहरात प्राणघातक हल्ला झाला आहे. त्यात त्यांच्या डोक्यावर वार करण्यात आले आहेत.

कुलकर्णी हे येथील सीताराम सारडा विद्यालयात मुख्याध्यापक म्हणून कार्यरत आहेत. ते व त्यांचे सहशिक्षक सुनील कुलकर्णी हे शनिवारी दुपारी दुचाकी वाहनावरुन घरी जात होते. त्यावेळी नगर शहरातील रासनेनगर परिसरात  दुचाकीवरुन आलेल्या तीन अज्ञात हल्लेखोरांनी त्यांचे वाहन अडविले. रॉडने हेरंब कुलकर्णी यांना मारहाण करण्यात आली. सुनील कुलकर्णी यांनी हल्लेखोरांपासून हेरंब कुलकर्णी यांची सुटका करण्याचा प्रयत्न केला असता त्यांनाही मारहाण करण्यात आली. जमाव जमल्यानंतर हल्लेखोर पसार झाले.

याप्रकरणी तोफखाना पोलीस स्टेशनला कुलकर्णी यांनी फिर्याद दिली आहे. दरम्यान, अद्यापर्यंत हल्लेखोरांना अटक झालेली नाही. त्यामुळे सामाजिक संघटना पोलीस अधीक्षकांची भेट घेणार आहेत. कुलकर्णी यांनी अनेक विषयांवर ठोस भूमिका घेऊन लेखन केलेले आहे. अकोले येथील दारुबंदी चळवळ तसेच नगर शहरातील सीताराम सारडा विद्यालय परिसरातील अतिक्रमणे हटविण्यासाठी त्यांनी ठोस भूमिका घेतलेली आहे. हल्ल्यामागे कोण आहेत याचा उलगडा अद्याप झालेला नाही.