लग्नाचे आमिष दाखवून तरुणीवर अत्याचार

संगमनेर तालुक्यात राहत असलेली तरुणी अहमदनगर शहरात एका रुग्णालयात परिचारिका म्हणून नोकरी करीत आहे. १३ जून २०२० ते ७ मे २०२१ या दरम्यान आरोपी फय्याज असलम शेख तरुणीला राहुरी तालुक्यातील चिंचोली फाटा, अहमदनगर येथील माळीवाडा परिसरातील यशोधन लॉज येथे घेऊन गेला. तिला लग्न करण्याचे आमिष दाखवून तिच्या इच्छेविरुद्ध तिच्यावर अत्याचार केला. इन्स्टाग्रामच्या माध्यमातून या तरुणीची शेख याच्याबरोबर ओळख झाली होती. ओळखीमधून घनिष्ठ संबंध निर्माण झाले. नंतर भेटीगाठी सुरू झाल्या. फसवणूक झाल्याचे लक्षात येताच तरुणीने राहुरी पोलिसांत धाव घेऊन घडलेला प्रकार पोलिसांसमक्ष कथन केला. गेल्या पाच दिवसांपासून परिचारिका गुन्हा दाखल करण्यासाठी राहुरी पोलीस ठाण्यात चकरा मारत आहे. अखेर सहाव्या दिवशी पोलिसांनी तिच्या फिर्यादीवरून पोलिसांत शेख याच्याविरोधात गुन्हा दाखल करण्यात आला आहे. घटनेनंतर आरोपी पसार झाला असून पोलीस त्याचा शोध घेत आहेत. या घटनेचा पुढील तपास पोलीस निरीक्षक नंदकुमार दुधाळ यांच्या मार्गदर्शनाखाली पोलीस उपनिरीक्षक निलेशकुमार वाघ हे करीत आहेत.