आई-वडिलांपाठोपाठ मुलाचेही निधन

श्रीगोंदा : आई-वडिलांच्या निधनाचा धक्का सहन न झाल्याने येथील माजी नगरसेवक संतोष किसनराव खेतमाळीस (४२) यांचेही सोमवारी (दि.३) सकाळी विळद (ता. नगर) येथील रुग्णालयात उपचार सुरू असताना निधन झाले.

संतोष खेतमाळीस यांचे वडील किसनराव व आई अनुसया यांचे मागील आठवड्यात कोरोनाने निधन झाले होते. तसेच संतोष खेतमाळीस यांच्यावरही विळद (ता .नगर) येथील विखे फाऊंडेशनच्या हॉस्पिटलमध्ये उपचार सुरू होते. तेथे त्यांना आई-वडिलांच्या निधनाची माहिती मिळाली. त्यानंतर संतोष खेतमाळीस हे मनातून प्रचंड खचले होते. त्यातच सोमवारी सकाळी त्यांचे ह्रदयविकाराच्या धक्क्याने निधन झाले. माजी नगराध्यक्षा सुनीता खेतमाळीस यांचे ते पती होते. त्यांच्या पश्चात एक मुलगा, एक मुलगी असा परिवार आहे.

ते आमदार बबनराव पाचपुते यांचे निष्ठावंत कार्यकर्ते होते. त्यांनी पक्षातील नेते अथवा इतर पक्षातील कोणावरही कधीच टीका अथवा आरोप केले नाहीत. त्यामुळे सर्वांशी त्यांचे मैत्रीपूर्ण संबंध होते. आमदार बबनराव पाचपुते, माजी आमदार राहुल जगताप, ज्येष्ठ नेते बाबासाहेब भोस, नागवडे कारखान्याचे अध्यक्ष राजेंद्र नागवडे, राष्ट्रवादीचे प्रदेश सरचिटणीस घनश्याम शेलार, नगराध्यक्षा शुभांगी पोटे, बाजार समितीचे माजी सभापती बाळासाहेब नाहाटा, बापू गोरे, अशोक खेंडके, सतीश बोरा, सुरेश भंडारी, मुख्याधिकारी मंगेश देवरे यांनी दु:ख व्यक्त केले आहे.

---

०३ संतोष खेतमाळीस