शेतक-याच्या ट्रक्टरखाली मुलाचा मृत्यू : संतप्त मजुरांच्या शेतकरी ठार

तालुक्यातील उक्कलगाव येथे मंगळवारी सायंकाळी ट्रॅक्टरखाली ऊस तोडणी मजुराच्या मुलाचा मृत्यू झाला.

श्रीरामपूर : तालुक्यातील उक्कलगाव येथे मंगळवारी सायंकाळी ट्रॅक्टरखाली ऊस तोडणी मजुराच्या मुलाचा मृत्यू झाला. घटनेनंतर संतप्त झालेल्या मजुरांनी जमावाने ट्रॅक्टर चालक शेतक-यावर काठ्या- कोयत्याने हल्ला केला. या हल्ल्यात शेतक-याचा मृत्यू झाला. या घटनेमुळे परिसर हादरून गेला आहे.
उक्कलगाव येथे पटेलवाडी रस्त्यावर दरंदले वस्तीजवळ ही घटना घडली. यात सोहम कन्ह्यालाल मोरे (वय- 5) व ट्रक्टर चालक अक्षय बाळासाहेब थोरात (रा. उक्कलगाव) यांचा मृत्यू झाला. घटनेनंतर तणाव निर्माण झाला आहे.
सायंकाळी सहा वाजेच्या सुमारास ही घटना घडली. थोरात हे ट्रॅक्टर घेऊन चालले असता मुलगा त्याखाली सापडला. त्यात त्याचा जागीच मृत्यू झाला. शेजारीच ऊस तोडणी मजुरांची राहुटी होती. संतापलेल्या मजुरांनी अक्षय थोरात यांच्यावर हल्ला केला. आठ ते दहा मजुरांनी केलेल्या हल्ल्यात थोरात यांचा मृत्यू झाला.
घटनेची माहिती मिळताच बेलापूर दुरक्षेत्राचे पोलीस कर्मचारी उक्कलगावला रवाना झाले. त्यांनी संशयित मजुरांना ताब्यात घेतले आहे. घटनेमुळे गाव हादरले आहे. ग्रामस्थांनी मोठी गर्दी केली होती.