राम शिंदे यांचा पराभव ही मोठी चूक

कर्जत : गेल्या विधानसभा निवडणुकीत राम शिंदे यांचा झालेला पराभव ही कर्जत, जामखेडकरांची चूकच झाली. आगामी निवडणुकीत पुन्हा भाजपच विजयी होईल, असा आत्मविश्वास अहमदनगर जिल्हा सहकारी बँकेचे नूतन संचालक आंबादास पिसाळ यांनी व्यक्त केला.

अहमदनगर जिल्हा मध्यवर्ती सहकारी बँकेच्या निवडणुकीत मिळवलेल्या विजयाबद्दल माजीमंत्री व भाजपचे प्रदेश उपाध्यक्ष प्रा. राम शिंदे यांच्या वतीने सोमवारी चोंडी येथे अंबादास पिसाळ यांचा सत्कार करण्यात आला. यावेळी पिसाळ पुढे म्हणाले, बँकेची निवडणूक भाजप प्रदेश उपाध्यक्ष, माजी मंत्री प्रा. राम शिंदे यांनी प्रतिष्ठेची केली होती. या निवडणुकीत भाजप कार्यकर्त्यांनी मेहनत घेतली होती. निवडणुकीत विजय खेचून आणला. विरोधकांना त्यांची जागा दाखवून दिली. कर्जत, जामखेडच्या जनतेने राम शिंदे यांचा गेल्या विधानसभेच्या निवडणुकीत पराभव करून चूक केली आहे. आता माझ्या विजयाने पुन्हा भाजपच्या विजयाची परंपरा सुरू झाली आहे, असे त्यांनी स्पष्ट केले.

यावेळी भाजपचे जिल्हा प्रसिद्धीप्रमुख सचिन पोटरे, माजी सरपंच दादासाहेब सोनमाळी, सरपंच काकासाहेब धांडे, नगरसेवक संदीप बरबडे, विजय भोसले, राजेंद्र तोरडमल, रवींद्र पिसाळ, संभाजी चव्हाण व भाजप कार्यकर्ते उपस्थित होते.

.....