जिल्हा अन‌् तालुका प्रशासनाच्या कोरोना रुग्णसंख्येत आढळली ४००ची तफावत

कोपरगाव : जिल्ह्यातील कोरोनाबाधितांच्या दैनंदिन आकडेवारीत कोपरगाव तालुक्याचे कमी रुग्ण, तर कोपरगाव प्रशासनाकडील आकडेवारीत जास्त रुग्ण आढळले. यात तब्बल ४०० रुग्णांची तफावत आढळली. आकडेवारीत एवढी मोठी तफावत कशी असू शकते, असे म्हणत महसूलमंत्री बाळासाहेब थोरात हे सहायक घटना व्यवस्थापक प्रशांत सरोदे यांच्यावर चांगलेच भडकले. त्यावर जिल्हाधिकाऱ्यांनी बाजू सावरण्याचा प्रयत्न केला.

कोरोनाची दुसरी लाट अतिशय गंभीर आहे. त्यामुळे जास्त खबरदारी घेणे अत्यंत गरजेचे आहे. लोकप्रतिनिधी, आरोग्य विभाग व प्रशासनाने एकत्र येऊन ही लढाई लढावयाची आहे, तर आरोग्य विभाग व प्रशासनाने येणाऱ्या अडचणी लोकप्रतिनिधींच्या माध्यमातून तत्काळ सोडवून घ्याव्यात, अशा सूचना थोरात यांनी केल्या आहेत.

कोपरगावातील कोरोनाच्या परिस्थितीचा आढावा घेण्यासाठी महसूलमंत्री बाळसाहेब थोरात हे रविवारी ( दि.११) कोपरगाव दौऱ्यावर आले होते. कोपरगाव येथील कृष्णाई मंगल कार्यालयात आढावा बैठक पार पडली.

गंभीर रुग्णांसाठी ऑक्सिजन व रेमडेसिवीर इंजेक्शनचा तुटवडा निर्माण झाला आहे. कोपरगाव तालुक्याला ऑक्सिजनचा पुरवठा कमी पडणार नाही. याची प्रशासनाने काळजी घ्यावी. इंजेक्शनचा काळाबाजार होणार नाही, याची खबरदारी घेऊन ग्रामीण रुग्णालयाच्या माध्यमातून सर्व कोविड केअर सेंटरला या इंजेक्शनचा पुरवठा करावा. सर्पदंशाच्या इंजेक्शनप्रमाणे तालुक्यातील ग्रामीण भागातील प्राथमिक आरोग्य केंद्रातही हे इंजेक्शन उपलब्ध करून द्यावे. जेणे करून रुग्णांना याची गरज भासल्यास नातेवाईक डॉक्टरांच्या चिठ्ठीने ते इंजेक्शन नेऊ शकतील. यासह इतरही विषयावर यावेळी चर्चा करण्यात आली.

..........

खासदार लोखंडे यांना केले लक्ष्य..

कोपरगाव तालुक्यात कोरोनाची एवढी भयावह परिस्थिती असताना पालकमंत्री तर सोडाच, परंतु, मतदारसंघाचे खासदार सदाशिव लोखंडे हेदेखील इकडे बघायला तयार नाहीत. तालुक्याला रुग्णवाहिका, अधिकचा मेडिकल स्टाफ उपलब्ध करून देणे गरजेचे असताना तसे होत नाही. यावरून खासदार लोखंडे यांना माजी सभापती सुनील देवकर यांनी चांगलेच लक्ष्य केले होते. त्यावर दोन वर्षांपासून मला निधीच नाही, असे म्हणून लोखंडे यांनी वेळ मारून नेली.