कुत्रीला लागलाय मांजरीचा लळा

मांजर आणि कुत्रा यांचे वैर सर्वश्रुत आहेच. मात्र, कर्जत शहरातील छोट्या राऊत यांच्या घरी मांजराचे पिल्लू चक्क कुत्रीला पीत आहे. हे दृश्य सर्वदूर कुतूहलाचा विषय बनले आहे. कर्जत-शिंदेवाडी रोडलगत छोट्या राऊत यांनी एक कुत्री व मांजर पाळलेली आहे. ही कुत्री आणि मांजर दोघीही एकाच वेळी प्रसूत (व्याले) झाले. मांजरीला सहा पिल्ले झाली, तर कुत्रीला पाच पिल्ले झाली. दुर्दैवाने मांजर आणि तिची पाच पिल्ले मरण पावली. मांजराचे एक पिल्लू जिवंत राहिले. या लहान पिल्लाला जगवायचे कसे, असा प्रश्न छोट्या राऊत यांना पडला होता. ते पिल्लू काही खात नव्हते. एक दिवस कुत्रीच्या पिल्लांसोबत मांजराच्या पिल्लाला कुत्रीला पाजले, तेव्हापासून मांजरीचे पिल्लू कुत्रीचेच दूध पित आहे.