लघवीला गेलेल्या गुजरातमधील चालकाला मारहाण करत पिकअप पळविली

संगमनेर शहर पोलिस ठाण्यात चार चोरट्यांविरोधात गुन्हा दाखल झाला आहे.

शेखर पानसरे, संगमनेर (अहमदनगर) : पिकअप वाहन रस्त्याच्या कडेला उभे करून चालक लघवीला गेला होता. त्या चालकाला चौघांनी मारहाण करत पिकअप पळवून नेल्याची घटना रविवारी (दि.१२) रात्री १२.१५ ते १२.३० वाजेच्या सुमारास नाशिक-पुणे महामार्गावर संगमनेर तालुक्यातील गुंजाळवाडी शिवारात घडली. पोलिसांना कासारा दुमाला शिवारात पिकअप मिळून आली. या प्रकरणी संगमनेर शहर पोलिस ठाण्यात चार चोरट्यांविरोधात गुन्हा दाखल झाला आहे.

पिकअप चालक महेश रतिलाल पंचाळ (वय ६०, रा. माधवनगर अवजारोड, ता. बागेडिया, जि. बडोदा, गुजरात) यांनी दिलेल्या फिर्यादीवरून पोलिसांनी गुन्हा नोंदवून घेतला. चालक पंचाळ हे पिकअपमधून मशिनरीचे स्पेआरपार्ट घेऊन जात होते, त्यांनी गुंजाळवाडी शिवारात रस्त्याच्या कडेला पिकअप उभी केली. ते लघवीला गेले असता तेथे आलेल्या चौघांनी त्यांना मारहाण करण्यात सुरूवात केली. त्यांची पिकअप त्या चौघांनी पळवून नेली. त्या संदर्भात पोलिसांना माहिती मिळाली असता पोलिसांनी पिकअप आणि पिकअप पळवून नेणाऱ्या चौघांचा शोध सुरू केला.

दरम्यान कासारा दुमाला शिवारात रस्त्याच्या कडेला पिकअप मिळून आली. चोरट्यांनी पंचाळ यांचा मोबाइल आणि अडीच हजार रुपये चोरून नेले. शहर पोलिस ठाण्याचे वरिष्ठ पोलिस निरीक्षक भगवान मथुरे यांच्या मार्गदर्शनाखाली पोलिस उपनिरीक्षक निवांत जाधव अधिक तपास करीत आहेत.