सामान्यांना आरोग्य सुविधा न मिळणे सरकारचे अपयश

कोरडगाव : राज्यातील सर्वसामान्य जनतेला आरोग्य सेवा न मिळणे हे सरकारचे मोठे अपयश आहे. अनेक ठिकाणी औषधांचा काळा बाजार भरलेले आहेत. ऑक्सिजनचा तुटवडा आहे. रुग्ण मृत्युमुखी पडत असताना सरकारला राजकारणापलिकडे काही दिसत नाही. विरोधी पक्षाने टीका करण्याऐवजी सरकारच विरोधी पक्षावर टीका करत असतानाची महाराष्ट्राच्या राजकारणातील ही पहिलीच वेळ आहे, अशी टीका आमदार मोनिका राजळे यांनी राज्य सरकारवर केली.

आगसखांड, (ता.पाथर्डी) येथे पंचायत समिती सभापती सुनीता दौंड व भारतीय जनता पक्षाचे जिल्हा उपाध्यक्ष गोकुळ दौंड यांनी स्वखर्चातून सुरू केलेल्या ३०० बेडच्या स्व. गोपीनाथ मुंडे साहेब कोविड केअर सेंटरच्या उद्घाटन प्रसंगी त्या बाेलत होत्या.

प्रांताधिकारी देवदत्त केकाण, भाजपचे दक्षिण जिल्हाध्यक्ष अरुण मुंडे, आदिनाथ महाराज शास्त्री, नगराध्यक्ष डॉ. मृत्युंजय गर्जे, मेजर बालाजी पोंधे, तालुका आरोग्य अधिकारी डॉ. भगवान दराडे, अमोल गर्जे, खरेदी -विक्रीचे संचालक बंडू बोरुडे, वृद्धेश्वरचे संचालक बाळासाहेब गोल्हार, पंचायत समिती सदस्य एकनाथ आटकर, विष्णूपंत अकोलकर, रणजित बेळगे, नारायणराव काकडे, अकोलेचे उपसरपंच अर्जुन धायतडक आदी उपस्थित होते.

राजळे म्हणाल्या, ‘‘कोरोनाच्या गंभीर परिस्थितीमध्ये राज्य सरकार आणि प्रशासकीय यंत्रणा पूर्णपणे अपयशी ठरली. रुग्णसंख्या वाढल्याने हॉस्पिटलमध्ये बेड न मिळणे, ऑक्सिजन, रेमडेसिविर औषधाचा काळा बाजार, हॉस्पिटलमध्ये होणारी रुग्णांची लूट अशा अडचणी निर्माण झाल्याने अनेक लोक मृत्युमुखी पडत आहेत. अवाजवी बिले आकारली जात आहेत. शासकीय उपजिल्हा रुग्णालयांमध्ये रेमडेसिविर औषध देण्यासाठी पात्रताधारक वैद्यकीय अधिकारी मिळत नाहीत. कोराेना लसी मिळत नाही, असे गंभीर प्रकार रोज घडताना दिसत आहेत. यावर उपाय म्हणून शेवगाव-पाथर्डी तालुक्यातील अनेक धर्मादाय संस्थांनी पुढाकार घेऊन कोविड केअर सेंटर केले आहेत.

---

दोन महिने पालकमंत्री फिरकतच नाहीत..

जिल्ह्याला दोन मंत्रीपदे आहेत. ते मंत्री फारसे जिल्ह्यात सक्रिय दिसत नाहीत. तर पालकमंत्री हसन मुश्रीफ हेही दोन महिन्यातून एखाद्यावेळी जिल्ह्यात येतात. त्यांना जनतेचे देणे-घेणे नाही. पालकत्व स्वीकारून पालकमंत्री काम करत नसतील तर जनतेने काय करावे, असा सवाल अरुण मुंडे यांनी केला.

--

२१ पाथर्डी कोविड

आगसखांड (ता.पाथर्डी) येथे स्व. गोपीनाथ मुंडे साहेब कोविड केअर सेंटरच्या उद्घाटन प्रसंगी आमदार मोनिका राजळे, प्रांताधिकारी देवदत्त केकाण, पंचायत समिती सभापती सुनीता दौंड, गोकुळ दौंड, अरुण मुंडे व इतर.