रेल्वेखाली शेतकऱ्याची आत्महत्या

अहमदनगर : पुणे-नागपूर एक्स्प्रेसखाली एका अनोखळी इसमाने स्वत:ला झोकून देत आत्महत्या केली आहे. सदरच्या इसमाची अद्याप ओळख पटलेली नसून त्याच्या अंगावरील कपड्यावरून तो शेतकरी असण्याची शक्यता रेल्वे पोलिसांनी व्यक्त केली आहे.
नगर येथून जाणाऱ्या पुणे-नागपूर एक्स्प्रेस या धावत्या रेल्वेगाडीखाली मंगळवारी (दि. १६) रात्री एका अज्ञात इसमाने आत्महत्या केली. मयताचे वय अंदाजे ३५ ते ४० वर्षे आहे. पाच फूट उंच, अंगाने मजबुत, रंगाने निमगोरा, गोल चेहरा, डोक्याचे केस अर्धवट काळे-पांढरे वाढलेले, दाढी-मिशा वाढलेली, अंगात पोपटी रंगाचा टी शर्ट, चॉकलेटी बनियन, राखाडी रंगाची फूल पॅण्ट असे मयताचे वर्णन आहे. मयताच्या अंगावरील बनियनवर ‘सात दिवसात तणांचा नाश’ असे छापील अक्षरात लिहिलेले आहे. यावरून मयत हा शेतकरी असून नगर तालुका परिसरातीलच असण्याची शक्यता पोलिसांनी व्यक्त केली आहे.