करंजी घाटात ट्रक-टँकरचा भीषण अपघात, दोन्ही वाहनांचे चालक ठार

पैठण तालुक्यातील विहामांडवा येथील जावेद शेख हे ट्रक (क्र. एमएच-१६, सीसी-२३४७) मधून शेंगादाण्याचे कट्टे घेऊन अहमदनगरच्या दिशेने चालले होते.

करंजी (अहमदनगर) : कल्याण-निर्मळ महामार्गावरील करंजी (ता. पाथर्डी) घाटाच्या पायथ्याला ट्रक आणि दुधाच्या टँकरची समोरासमोर जोरदार धडक होऊन झालेल्या भीषण अपघातात दोन्ही वाहनांचे चालक ठार झाले तर अन्य दोनजण गंभीर जखमी झाले. जावेद मन्सुर शेख व शिवाजी नानासाहेब भवार अशी अपघातात मयत झालेल्या चालकांची नावे आहेत. कल्याण-निर्मळ महामार्गावरील पाथर्डी तालुक्यातील करंजी घाटाच्या पायथ्याशी सोमवारी (दि.१६) रात्री उशिरा साडेबारा वाजण्याच्या सुमारास हा अपघात झाला. 

पैठण तालुक्यातील विहामांडवा येथील जावेद शेख हे ट्रक (क्र. एमएच-१६, सीसी-२३४७) मधून शेंगादाण्याचे कट्टे घेऊन अहमदनगरच्या दिशेने चालले होते. तर दुधाचा रिकामा टँकर (क्र. एमएच-१६-एवाय-९९७९) घेऊन शिवाजी भवार हे करंजीकडे येत होते. करंजी घाट संपल्यानंतर थोड्याच अंतरावर या दोन्ही वाहनांची समोरासमोर धडक होऊन भीषण अपघात झाला. यात ट्रक चालक जावेद मन्सुर शेख (रा. विहामांडवा, पैठण, जि. छत्रपती संभाजीनगर) व टँकर चालक शिवाजी नानासाहेब भवार (रा. निवडुंगे, ता. पाथर्डी, जि. अहमदनगर) हे दोघे ठार झाले. ट्रकमधील अन्य दोघेजण गंभीर जखमी झाले. मध्यरात्री अपघात झाल्यामुळे जखमींना वेळेत मदत मिळाली नाही. परंतु धडक झाल्यानंतर मोठा आवाज झाला. या आवाजाने आजूबाजूचे लोक जागे झाले. छत्रपती शिवाजी प्रतिष्ठानच्या तरुणांनी अपघातस्थळी धाव घेऊन अपघातग्रस्तांना मदत केली. या अपघातात दोन्ही वाहनांचे मोठे नुकसान झाले आहे.