एका दिवसात कोरोनाबाधित ४५ जणांवर अंत्यसंस्कार

अहमदनगर : कोरोनाने जिल्हाभर कहर माजवला आहे. मागील दोन दिवसांपासून मृत्यूच्या संख्येने उच्चांक गाठला असून, गुरुवारी दिवसभरात ४५ जणांवर अंत्यसंस्कार करण्यात आले. पहाटेपर्यंत अंत्यविधी सुरू होते. वर्षभरातील सर्वाधिक मृत्यू एका दिवसात झाल्याने चिंता व्यक्त केली जात आहे.

जिल्ह्यात दररोज दोन हजारांहून अधिक नव्या रुग्णांची भर पडत आहे. औषधांचाही तुटवडा निर्माण झाला आहे. मृतांच्या संख्येत आठवभरात अचानक वाढ झाली आहे. बुधवारी १९ जणांचा कोरोनामुळे मृत्यू झाला. हा आकडा गुरुवारी एकदम वाढला. दिवसभरात अमरधामध्ये ४२ तर दफनभूमीमध्ये ३ आशा ४५ जणांवर अंत्यविधी करण्यात आला. अमरधाममध्ये कोरोनाबाधितांवर अंत्यसंस्कार करण्यासाठी दोन विद्युत दाहिन्या आहेत. एका मृतदेहावर अंत्यसंस्कार करण्यासाठी दीड तासाचा कालावधी लागतो. गुरुवारी दिवसभरात दोन विद्युत दाहिन्यांमध्ये २० मृतदेहांवर अंत्यसंस्कार करण्यात आले. सकाळी दहा वाजता सुरू झालेल्या विद्युत दाहिन्या सायंकाळपर्यंत सुरू होत्या. मृतांचा आकडा मोठा असल्याने २२ मृतदेह ओट्यांवर ठेवून अंत्यसंस्कार करावे लागले. अंत्यसंस्कार सहाय्यक मंडळाने लाकूड व गोवऱ्यांची व्यवस्था केली. अचानक एवढ्या मोठ्या प्रमाणात मृतदेह अंत्यविधीसाठी दाखल झाल्याने अमरधाममधील यंत्रणेवरही ताण आला. अंत्यविधीवेळी नातेवाईकांना प्रवेश दिला जात नाही. महापालिकेने नियुक्त केलेल्या ठेकेदाराचे चार कर्मचारी हे काम अहोरात्र करत आहेत. त्यांनी दिवसभर अंत्यविधीचे काम केले. रात्री तर मृतदेह घेऊन येणाऱ्या शववाहिकांची रांगच लागली होती. त्यामुळे व्यवस्थापनाने ओट्यावर अंत्यविधी उरकले. रात्री दीड वाजेपर्यंत अंत्यविधीचे काम सुरू होते. त्यानंतर पुन्हा शुक्रवारी सकाळी विद्युत दाहिन्या सुरू करण्यात आल्या. दुपारपर्यंत कोरोनामुळे दहाजणांचा मृत्यू झाला. सायंकाळी हा आकडा आणखी वाढेल, असे सांगण्यात आले.

....

एका शववाहिकेतून ५ ते ६ मृतदेहांची वाहतूक

जिल्हा शासकीय रुग्णालयातून मतदेह अंत्यविधीसाठी अमरधाम येथील स्मशानभूमीत आणण्यासाठी एकच शववाहिका आहे. साधारणपणे एका खेपेत ५ ते ६ मृतदेह जिल्हा रुग्णालयातून अमरधाम येथे आणले जातात. एका मृतदेहावर अंत्यंसस्कार करण्यासाठी साधारपणे दीड तास लागतो. तोपर्यंत आणखी सहा मृतदेह आणून ठेवलेले असतात. त्यात खासगी रुग्णालयातील मृतांचा आकडाही मोठा आहे. खासगी रुग्णालयातील शववाहिकेतूनही मृतदेह अंत्यविधीसाठी अमरधाम येथेच आणले जात असल्याने यंत्रणेचा गोंधळ उडत असल्याचे चित्र आहे.

......

मनपाची नवीन शववाहिका अडकली लालफितीत

कोरोनाच्या पहिल्या लाटेत गत एप्रिल महिन्यात एका दिवसात कोरोनामुळे ३८ जणांचा मृत्यू झाल्याची घटना घडली होती. त्यावेळी एकाच शववाहिकेतून पाच ते सहा मृतदेहांची वाहतूक होत असल्याची बाब समोर आली. त्यामुळे मनपाने अन्य एक शववाहिनी खरेदी करण्याचा निर्णय घेतला. परंतु, वर्ष उलटूनही नवीन शववाहिका खरेदी केलेली नाही. त्यामुळे एकाच शववाहिकेतून ५ ते ६ मृतदेहांची वाहतूक आजही सुरू असल्याचे दिसून आले.