अपहृत तरुणाचा खून की आत्महत्या?

टाकळी ढोकेश्वर : पारनेर तालुक्यातील खडकवाडी येथील संतोष साहेबराव ढोकळे (वय ३१) या विवाहित तरुणाचे रविवारी अपहरण झाल्यानंतर त्याचा मृतदेह मंगळवारी संशयास्पद अवस्थेत सापडला.
याबाबत यशवंत भाऊसाहेब हुलवळे (वय ३५, रा. खडकवाडी, ता. पारनेर) यांच्या फिर्यादीवरून पारनेर पोलीस ठाण्यात अपहरणाचा गुन्हा नोंदविण्यात आला. दरम्यान, याप्रकरणी पोपट तुकाराम ढोले या संशयितास पोलिसांनी चौकशीसाठी ताब्यात घेतले आहे.
बहिणीची छेडछाड करून तिचा पाठलाग केल्याच्या कारणावरुन मृत संतोषला रविवारी रात्री ९.३० वाजेच्या सुमारास सीमा राजेंद्र आमले (रा. आमलेवाडी, सावरगाव घुले, ता. संगमनेर), पोपट जयराम ढोले (रा. येणेरे, ता. जुन्नर, जि. पुणे) यांनी आम्हाला कोंबड्या घ्यायच्या आहेत, असे कारण सांगून त्यास पोल्ट्री फार्मवर नेऊन बळजबरीने चारचाकी वाहनात बसवून त्याचे अपहरण केल्याचे हुलावळे यांनी फिर्यादीत म्हटले आहे.
मंगळवारी साकूर घारगाव रस्त्यावरील जांबूत घाटाजवळ नांदूर खंदरमाळ (ता.संगमनेर) शिवारात राधाबाई बाबुराव भागवत यांच्या शेतात मंगळवारी सकाळी ७ च्या सुमारास लिंबाच्या झाडाला गळफास घेतलेली अनोळखी व्यक्ती दिसल्याची माहिती नांदूर खंदरमाळचे पोलीस पाटील किसन पंढरीनाथ सुपेकर यांनी घारगाव पोलीस ठाण्यास खबर दिली. त्यानुसार घारगावचे पोलीस निरीक्षक दिलीप निघोट यांनी घटनास्थळी जाऊन पाहणी केली.
तेव्हा लिंबाच्या झाडाला फेट्याने गळफास घेतलेला मृत तरुण दिसला. त्याच्या छाती, पाठ, हात व गळ्यावर धारदार शस्त्रासह इतर वस्तूने मारलेल्या जखमा दिसल्या. गळफास घेतल्यामुळे याप्रकरणी अकस्मात मृत्युची नोंद केल्याचे निघोट यांनी सांगितले.
या मृतदेहाची शहानिशा करण्यासाठी पारनेर पोलीस ठाण्याशी संपर्क साधल्यानंतर हा मृतदेह खडकवाडीच्या संतोषचाच असल्याचे उघड झाले.
(वार्ताहर)
सध्या पोलिसांनी अकस्मात मृत्युची नोंद केली असली तरी हा खून की आत्महत्या, याचे गूढ निर्माण झाले आहे. संगमनेरच्या रुग्णालयात उत्तरीय तपासणी केल्यानंतर मृतदेह नातेवाईकांच्या ताब्यात देण्यात आला. टाकळी ढोकेश्वर पोलीस ठाण्याचे फौजदार घुगे, सहायक फौजदार माळवदे तपास करीत आहेत.