शेतात ट्रॅक्टर घातल्याने एकमेकांना मारहाण

परस्परविरोधी गुन्हे दाखल; जांभुळवाडीतील घटना

लोकमत न्यूज नेटवर्क

घारगाव : शेतात ट्रॅक्टर घातल्याच्या कारणावरून एकमेकांना लोखंडी गजाने व काठीने मारहाण करण्यात आली. ही घटना शनिवारी (दि.३) दुपारी साडेचारच्या सुमारास संगमनेर तालुक्यातील पठार भागातील जांभुळवाडी (साकुर) शिवारात घडली. याप्रकरणी घारगाव पोलीस ठाण्यात दोन परस्परविरोधी फिर्यादीवरून १८ जणांविरोधात गुन्हे दाखल करण्यात आले आहेत.

अशोक भागा थोरात (वय २८, रा. जांभूळवाडी, ता.संगमनेर ) याने दिलेल्या फिर्यादीवरून प्रकाश पोपट थोरात, नितीन रामा खेमनर, शंकर रामा खेमनर, चंदन रामा खेमनर, बाबाजी लहानु खेमनर, राजू भागा खेमनर, छबन मच्छिंद्र खेमनर, पोपट रखमा थोरात (सर्व रा. जांभुळवाडी, ता. संगमनेर) यांच्या विरोधात गुन्हा दाखल करण्यात आला.

दुसरी फिर्याद सारिका नितीन खेमनर (वय २३, रा. जांभूळवाडी, ता. संगमनेर) यांनी दिली आहे. त्यांनी दिलेल्या फिर्यादीवरून भागा नाना थोरात, अशोक भागा थोरात, सोपान भागा थोरात, बाळू नाना थोरात, प्रवीण बाळू थोरात यांसह इतर चार ते पाच अनोळखी इसम (सर्व रा. जांभुळवाडी, ता. संगमनेर) यांच्या विरोधात गुन्हा दाखल करण्यात आला. अधिक तपास पोलीस हेडकॉन्टेबल सुरेश टकले करीत आहेत.