घरफोडी करणाऱ्या सराईत गुन्हेगारांची टोळी जेरबंद

राजश्री उर्फ रासर सिकंदऱ्या काळे (वय ४५), प्रमोद रासर काळे (वय १९) व मेघराज राजा काळे (वय २०, सर्व रा. भगतवाडी) असे अटक करण्यात आलेल्या तिघांची नावे असून त्यांच्याकडून १७ हजार २५० रुपयांचा मुद्देमाल जप्त करण्यात आला आहे. या तिघांसह त्यांच्या साथीदारांनी ७ मे रोजी कर्जत तालुक्यातील खेड येथे दीपक भरत मोरे यांच्या घराचा दरवाजा तोडून ४८ हजार रुपयांचा ऐवज चोरून नेला होता. या गुन्ह्याचा समांतर तपास करत असताना स्थानिक गुन्हे शाखेच्या पथकाने आरोपींना अटक केली. जिल्हा पोलीस अधीक्षक मनोज पाटील, अप्पर पोलीस अधीक्षक सौरभकुमार अग्रवाल यांच्या मार्गदर्शनाखाली स्थानिक गुन्हे शाखेचे निरीक्षक अनिल कटके यांच्या पथकाने ही कारवाई केली. अटक करण्यात आलेल्या आरोपी विरोधात करमाळा, दौंड, श्रीगोंदा, तोफखाना आदी पोलीस ठाण्यात दरोडा, जबरी चोरी असे गंभीर गुन्हे दाखल आहेत. या आरोपींकडून आणखी गंभीर गुन्हे उघड होण्याची शक्‍यता असून पोलीस पुढील तपास करत आहेत.

................................

घरफोडी करणाऱ्या तिघा आरोपींना पोलिसांनी अटक केली.